Б.АСАНОВ «ЕРЕН ЕҢБЕГІ ҮШІН» МЕДАЛЬІМЕН МАРАПАТТАЛДЫ

Түркістандағы «Конгресс холл» сарайында «Тұғырлы бол, Тәуелсіздік» атты іс-шарасында облыс әкімі Өмірзақ Шөкеев, ҚР-ның Президенті Қасым-Жомарт Тоқаевтың Жарлығымен Мақтаарал ауданының әкімі Асанов Бақыт Насырханұлы «Ерен еңбегі үшін» медальімен марапатталғанын жариялап,  аталған медальді оның кеудесіне тақты-деп хабарлайды Мақтаарал ауданының әкімдігі.

Б.Асанов жаңадан құрылған Мақтаарал ауданының экономикалық жағдайын жақсартуға ерекше еңбек сіңіруде.  Бүгінде аудан орталығы Мырзакент кентінде ескірген нысандардың барлығы жаңарып, көшелерінің барлығы дерлік асфальттенді. Ағаштар егіліп, жарқырата жарықшамдар орнатылды. Субұрқақтар атқылап, гүлдер жайқалды.

Оның ұйымдастырушылық қабілеті әсіресе ағымдағы жылдың мамыр айында орын алған техногендік апат кезінде байқалды. Сол кезде ол жедел шаралар қабылдап, топан су түбіне келген Жеңіс ауылын 2 сағаттың ішінде эвакуациялатып үлгерген. Одан бөлек, апаттың зардаптарын жою бойынша көптеген жұмыстардың ұйытқысы болып, әрбір ауыртпалықты мойнымен көтере білді. Сонымен қатар, оның жіті қадағалауымен  Мырзакентте бой көтерген жаңа шағын аудан мен Өргебас және Фирдаусидегі салынып жатқан 1000-ға жуық үйдің әрбірінің сапалы салынуын қадағалау қиыннан қиыстырумен бірдей еді. Бірақ, Бақыт Асанов мұның үдесінен шықты. Бүгінде үйсіз қалған тұрғындардың барлығы да үйлі, көңілдері күйлі болып отыр.

Мемлекет басшысы Қасым-Жомарт Тоқаев тамыз айында Мақтаарал ауданына жасаған жұмыс сапары барысында «Ең бастысы, бірде-бір адам шығыны болған жоқ» деп, жергілікті биліктің жұмысына оң баға берген болатын. Енді міне аудан басшысы сонда қайғылы жағдайға орын бермегені үшін мемлекеттік марапатқа ие болып отыр.

Серік ДОСЫМОВ, Мырзакент.