Сайлауға белсенді түрде қатысайық!

         Сайлау – ел өміріндегі маңызды қоғамдық-саяси үдерістердің бірі. Бұл – әр азаматтың өз пікірін білдіріп, елдің болашағына қатысты ұстанымын танытатын демократиялық таңдау мүмкіндігі. Сондықтан сайлауға қатысу – азаматтық жауапкершіліктің маңызды көрінісі.

       Қоғамның дамуы мен елдің ертеңі халықтың белсенділігіне тікелей байланысты. Әрбір дауыс – ел болашағына қосылған үлес. Өз таңдауын жасау арқылы азаматтар қоғамдағы маңызды мәселелерге деген көзқарасын білдіреді. Сол себепті сайлау күні өз учаскеңізге барып, заң талаптарына сәйкес өз таңдауыңызды жасау – баршаға ортақ жауапкершілік.

       Сайлауға қатысу тек дауыс берумен шектелмейді. Бұл – елдегі өзгерістерге бейжай қарамай, қоғамдық өмірге белсенді араласу, өз ұстанымыңды білдіру. Әсіресе жастардың азаматтық белсенділігін арттырудың маңызы зор. Себебі бүгінгі жас – ертеңгі ел тізгінін ұстайтын азамат.

       Сайлау кезінде әрбір сайлаушы өз таңдауын саналы түрде жасауы қажет. Кандидаттар мен олардың бағдарламаларымен танысып, ақпаратты сенімді дереккөздерден алып, өз шешіміңді асықпай қабылдаған жөн. Ең бастысы – таңдау еркін әрі жауапкершілікпен жасалуы керек.

        «Бірлік бар жерде – тірлік бар» деген халық даналығы бар. Елдің бірлігі мен тұрақтылығы әр азаматтың қоғамдық жауапкершілігінен басталады. Сондықтан сайлаудан тыс қалмай, өз азаматтық құқығымызды пайдаланайық.

Досан ТҰРҒАРА,

Мақтаарал ауданы.