ЖАҢА ҚОНЫС ИЕЛЕРІНЕ ПӘТЕР КІЛТТЕРІ ТАБЫСТАЛДЫ

        Қазақстан Республикасы Үкіметінің №736 қаулысымен бекітілген «Тұрғын үй-коммуналдық инфрақұрылымды дамытудың 2023–2029 жылдарға арналған тұжырымдамасы» аясында Мақтаарал ауданында халықты тұрғын үймен қамтамасыз ету бағытындағы жұмыстар жүйелі түрде жалғасуда.

        Осы бағдарлама шеңберінде Жаңажол ауылдық округіне қарасты Фирдауси елді мекенінде салынған 100 тұрғын үйдің құрылыс-монтаж жұмыстары толық аяқталды. Соның алғашқы кезеңінде 52 тұрғын үй «Отбасы банк» АҚ арқылы тұрғын үй кезегінде тұрған әлеуметтік жағынан осал топтарға жататын азаматтар мен көпбалалы отбасыларға табысталды.

        Пәтер кілттерін табыстау салтанатына Мақтаарал ауданының әкімі Бақыт Асанов қатысып, жаңа қоныс иелерін қуаныштарымен құттықтады.

       – Баспана – әрбір отбасының бақыты мен берекесінің, тұрақтылығы мен жарқын болашағының негізі. Сондықтан бүгінгі күн – көптеген отбасылар үшін жаңа өмірдің бастауы, көптен күткен арманның орындалған сәті. Жаңа қонысқа ие болып отырған барлық отбасыларды шын жүректен құттықтаймын! Шаңырақтарыңыз шаттыққа, дастархандарыңыз берекеге толсын! Жаңа үйлеріңізге құт-береке, ырыс пен ынтымақ орнасын! Балаларыңыздың күлкісі үзілмей, әр шаңырақта бақыт пен бақ-дәулет мәңгілік мекен етсін! – деді аудан әкімі.

      Жаңа тұрғын үйлер тұрғындардың жайлы әрі қауіпсіз өмір сүруіне қажетті барлық инженерлік инфрақұрылыммен қамтамасыз етілген. Атап айтқанда, әрбір үйге табиғи газ, электр энергиясы, ауыз су және кәріз жүйесі жүргізілген. Сонымен қатар, тұрғын үй аумағы толық абаттандырылып, асфальт-бетон жабыны төселіп, кірме жолдар ретке келтірілген.

         Әрбір тұрғын үйдің жалпы аумағы 63 шаршы метрді құрайды. Пәтерлерде кіреберіс бөлме, үш тұрғын бөлме, ас үй және санитарлық торап қарастырылған. Сондай-ақ, әр үйге 7 сотық жер телімі беріліп, тұрғындардың жеке қосалқы шаруашылық жүргізуіне, бау-бақша өсіріп, тұрмысын жақсартуына мүмкіндік жасалған.

       Жаңа баспананың кілтін алған отбасылар мемлекет тарапынан көрсетіліп отырған қолдау үшін ризашылықтарын білдіріп, көптен күткен армандарының орындалуына үлес қосқан азаматтарға алғыстарын жеткізді.