ЕРІКТІ ҚОНЫС АУДАРУҒА МЕМЛЕКЕТТІК ҚОЛДАУ КҮШЕЙТІЛДІ

            Қазақстанда еңбек күші артық өңірлерден кадр тапшылығы бар аймақтарға ерікті түрде қоныс аудару бағдарламасы жаңартылып, мемлекеттік қолдау шаралары кеңейтілді. Ең маңызды жаңалықтың бірі – экономикалық ұтқырлық сертификатының ең жоғары мөлшері 1 625 АЕК-ке дейін, яғни 7 миллион теңгеге ұлғайтылды. Бұл қаражат жаңа қоныстанған өңірден тұрғын үй сатып алуға беріледі.

         Бағдарламаның негізгі мақсаты – еңбек ресурстарын өңірлер арасында тиімді орналастыру, кадр тапшылығын азайту және азаматтардың тұрақты жұмыспен қамтылуына жағдай жасау. Бүгінде жұмыс күші негізінен ауыл шаруашылығы, білім беру, денсаулық сақтау, құрылыс, өнеркәсіп, көлік және коммуналдық қызмет салаларында қажет.

        Мемлекеттік қолдау тұрғын үй сертификатымен ғана шектелмейді. Қоныс аударушыларға көшуге арналған біржолғы субсидия, тұрғын үйді жалдау мен коммуналдық қызмет шығындарын өтеу, жұмысқа орналасуға жәрдемдесу, қажет болған жағдайда кәсіби оқыту және қайта даярлау мүмкіндігі қарастырылған.

       Бағдарламаның тағы бір артықшылығы – азаматтар жаңа өңірге көшпей тұрып-ақ бос жұмыс орындарымен танысып, жұмыс берушімен келіссөз жүргізе алады. Сондай-ақ барлық қызметтер migration.enbek.kz ақпараттық порталы арқылы электронды форматта көрсетіледі. Порталда бос жұмыс орындары, сұранысқа ие мамандықтар, қоныс аударуға ұсынылған өңірлер және мемлекеттік қолдау шаралары туралы толық ақпарат орналастырылған.

        Қазіргі таңда бағдарламаға жұмыссыз азаматтармен қатар, еңбек нарығында сұранысқа ие мамандар, басқа өңірге көшуді жоспарлаған жұмыспен қамтылған азаматтар, сондай-ақ шаруа және фермер қожалықтарының басшылары да қатыса алады.

       Ерікті қоныс аудару бағдарламасы 2017 жылдан бері жүзеге асырылып келеді. Осы уақыт ішінде оған 73,9 мың адам қатысып, 31 мыңнан астамы тұрақты жұмыспен қамтылған.

        Мамандардың айтуынша, қоныс аудару туралы шешім қабылдар алдында ұсынылған жұмыстың тұрақтылығын, жалақы мөлшерін, тұрғын үйдің жағдайын, әлеуметтік инфрақұрылымды және отбасы мүшелерінің қажеттіліктерін жан-жақты саралаған жөн.

        Жаңартылған бағдарлама азаматтардың жаңа өңірде тұрақты өмір сүруіне қолайлы жағдай жасап қана қоймай, кадр тапшылығы бар аймақтардың әлеуметтік-экономикалық дамуына да оң ықпал етуді көздейді.