АУЫЛДЫҢ ДАМУЫ – ЕЛ ДАМУЫНЫҢ КЕПІЛІ

              Қазан айының алғашқы аптасында, Түркістан облысының Нысанбек ауылында «Ауыл» партиясының ІІІ тоқсанды қорытындылауға арналған кеңейтілген жиыны өтті. Оған, Мәжіліс депутаттары, партияның өңірлік филиал басшылары мен белсенді мүшелері қатысты.

        Жиынды ҚР Парламенті Мәжілісінің депутаты, Аграрлық мәселелер комитетінің және «Ауыл» партиясының төрағасы Серік Егісбаев ашып, партияның жыл соңына дейінгі негізгі басымдықтарын атап өтті.

          – «Ауыл – елдің діңгегі. Оның әлеуетін арттыру – мемлекеттің стратегиялық міндеті. Сондықтан, партия қызметінің басты мақсаты – нақты нәтижеге бағытталған іс-қимыл мен өңірлердің белсенді ынтымақтастығы болуы тиіс», – деді Серік Егісбаев.

      Жиында партияның ІІІ тоқсандағы қызметі сараланып, орталық пен өңірлік құрылымдардың ұйымдастыру, медиа және коммуникация, жастар саясаты, қоғамдық бастамаларды қолдау бағытындағы жұмыстары талқыланды.

      Семинарға «Ауыл» партиясы Абай облысы бойынша өңірлік филиалының төрағасы Қ.Смағұлов қатысып қайтқан болатын. Онда, өңірлік филиалдардың белсенділігі мен жергілікті бастамалар талданып, ауылдық жерлердің әлеуметтік-экономикалық дамуы, аграрлық секторды қолдау және тұрғындардың өмір сапасын арттыру жөнінде нақты ұсыныстар айтылды.

       Кездесу соңында, қатысушылар алдағы тоқсандағы жұмыс басымдықтарын айқындап, жаңа жобаларды жүзеге асырудың нақты тетіктерін белгіледі.

         Түркістан төрінде өткен бұл басқосу — ауылдық аймақтардың дамуын жеделдетуге, партия қызметін жаңғыртуға және өңірлер арасындағы ынтымақтастықты күшейтуге бағытталған маңызды қадам болмақ.

«Ауыл» партиясы Абай облысы бойынша өңірлік филиалының баспасөз қызметі.