СҰЛУ СЫР ЕЛІНЕН – ҰЛЫ АБАЙ ЕЛІНЕ!

        Семейде Қызылорда мен Абай облыстарының мәдени ынтымағын паш еткен тамаша концерт өтті.

        Семей қаласында өткен «Сұлу Сыр елінен – Абай еліне!» концерті көрермендерді ерекше әсерге бөледі. Біз осы кештен рухани әсер алған қала тұрғыны, медицина саласының маманы Сымбат Серғазықызымен сұхбаттасқан едік.

       Журналист:
       – Бүгінгі концерттен алған алғашқы әсеріңіз қандай? Қай өнер нөмірі немесе қай сәт ерекше ұнады?

         Сымбат Серғазықызы:

       – Өнердің алмайтын қамалы жоқ қой. Ән мен күй, жыр мен би ешқандай шекараға бағынбайды – ол еркін, шексіз құдірет. Соның айғағындай, бүгінгі «Сұлу Сыр елінен – Абай еліне!» концерті өте әсерлі, тамаша мәдени шара болды деп санаймын. Қызылорданың… Сыр елі шын мәнінде өнерге бай екеніне тағы бір мәрте көз жетті. Оркестрдің үйлесімділігі мен шеберлігі құлақтың құрышын қандырып, жанды тербетті. Әсіресе, бишілердің сахналық мәдениеті мен үлкен шығарылымы ерекше ұнады.

         Журналист:
         – Қызылорда мен Семей арасындағы мәдени байланыстарды насихаттау тұрғысынан бұл шараның мәнін қалай бағалайсыз?

        Сымбат Серғазықызы:

        – Мәдениет пен білім – ел іргетасы. Сондықтан қос облыстың байланысты дәл осы сала арқылы бастауы – өте құптарлық қадам. Ән мен жыр, күй мен би жүрген ортада адамның көңілі жайланып, жаны жадырап, өзге игі істерге деген құлшынысы артады. Бұл концерт Сыр елінің өнерін паш етіп қана қоймай, Абай елінің көрермендеріне ой салып, жаңа жоспарларға бастау бергендей…

        Журналист:
        – Алдағы уақытта осындай өңіраралық мәдени іс-шаралардың жиі ұйымдастырылуын қалайсыз ба? Қандай ұсыныстарыңыз бар?

        Сымбат Серғазықызы:

       – Әрине, мұндай шаралар жиі ұйымдастырылса нұр үстіне нұр болар еді. Батыс, Оңтүстік, Солтүстік және Орталық өңірлер де осындай мәдени тоғысу кештерін өткізсе, елдің мәдени және экономикалық байланыстары нығая түсері анық. Бұл бастама өзге аймақтарға да үлгі болып, халықты жақындастыра түсетініне сенемін.

        Журналист:
        – Сыр мен Сарыарқа арасындағы рухани көпір болған бұл концерт ел ішіндегі мәдени ынтымақтастықтың жарқын үлгісі болды деп айтуға толық негіз бар. «Сұлу Сыр елінен – ұлы Абай еліне!» кеші қос өңірдің достығын тереңдетіп, өнердің мәңгілік құдіретін тағы да дәлелдеді.

«Ауыл» партиясы Абай облысы бойынша өңірлік филиалының  баспасөз қызметі.