«АБАЙ ТОЙЫ» ЖОҒАРЫ БАҒАЛАНДЫ

         Қазақтың маңдайына біткен жарық жұлдызы, дана ойшыл Абай Құнанбайұлының есімі – халқымыздың рухани асқарына айналған. Оның әрбір өлеңі, әрбір қара сөзі – мәңгілік бағдаршам, ұрпаққа өсиет. Сондықтан, «Абай тойы» – тек бір ақынның мерейтойы емес, күллі қазақ халқының рухани мерекесі, ұлттық бірліктің мәртебелі алтын айғағы.

          Биыл, Хакімнің «180 жылдық мерейтойы»  республика көлемінде кеңінен  аталып өтті. Бұл той – өткенді ұлықтап, болашаққа бағдар жасайтын, ұрпақтың жүрегіне Абай даналығын ұялата түсетін тағылымы мол рухани шара болды деп толыққанды айтуға негіз бар…

        Хакім Абайдың мерейтойына орай еліміздің түкпір-түкпірінде ғылыми конференциялар, әдеби кештер, мәдени-рухани бағдарламалар ұйымдастырылып, халық рухани қуанышқа бөленді. Әлемдік деңгейде де Абайдың есімі асқақтап, адамзатқа ортақ ойшыл ретінде дәріптелді.

       Бұл мерекелі күнде біздің Бородулиха ауданы да шет қалмай, Абайға деген құрметін нақты ісімен көрсете білді. Ауданнан 12 киіз үй тігіліп, халыққа ұлттық салт-дәстүріміздің сән-салтанаты паш етілді. Киіз үйлердің іші  қатпарлы шежіреге, өнегелі өнерге, ақ  дастарханға толып, келген қадірлі қауым — қонақтар қазақы қонақжайлықтың дәмін татты.

         Елді дүр сілкіндірген аламан бәйге де осы мерейтойдың көркіндей болғаны рас.

           Аламан бәйгеден бастап ұлттық ойындар тартысқа толы өткізілді. Жеңімпаз жүйріктің иесіне автокөлік тарту етілуі – халықтың шаттығын еселей түсті. Бұл – «Абай тойының» абыройын асқақтатқан айрықша сәт. Айта кетейік, «Бас бәйгені» тарту еткен — Бородулиха ауданы. Сонымен бірге,  ауданымыздың түрлі  мекеме қызметкерлері де, өнерпаздары да мерекелік шараға белсене араласты. Ән мен күйден шашу шашылып, жыр мен  терме әуелеп, Абайдың рухани әлемі халықпен қайта қауышқандай әсер қалдырды.

        «Абай тойы» – қазақ елінің тойы. Ол – дана ойшылдың мұрасын дәріптеп қана қоймай, ұрпаққа үлгі, халыққа рух беретін айтулы мереке.

          Бородулиха ауданының қосқан  үлесі – елдің бірлігі мен еңбегінің айғағы.

         Осы орайда, хакім Абайдың «Қалың елім, қазағым, қайран жұртым» деген жан айқайы бүгінгі ұрпақтың жүрегінде жаңғырып, елін сүйген, білімге құштар, рухани биік ұрпақ тәрбиелеуге бастайтындай көрінеді.

        Абай тойы – халық рухының салтанаты!

    Мейрамгүл АТАЕВА,

Абай облысы, Бородулиха ауданының

«Мемлекеттік және басқа тілдерді оқыту орталығының» директоры.