ӨЛЕҢ ӨНЕРІНЕ ЕНГЕН «ТӘҢІРМЕН ТІЛДЕСУ» ЖЫР ЖИНАҒЫНА ПІКІР

              Өлеңсүйер оқырманның жүрегіне жол таба алатын бұл жинақты оқи отырып, өзімнің жастық шағымды, өз басымнан өткізген сол сезімдерді қайта кешкендей болдым. Өйткені ақынның өлеңдері жәй ғана сөз, жәй ғана шумақ емес, ол – бастан өткерген өмірдің өзі.

       Ал «Тәңірмен тілдесу» бейнесі – көп оқырман үшін ортақ сезімге айналары анық. Ақын лирикалық кейіпкерін жәй бір, қаймана адам ретінде емес, өмірдегі ең нәзік, ең жақын, ең алапат сағыныштың символы ретінде көрсете алған. Бұл – үлкен шеберлік.
Өлеңдерінен табиғи сезімдер мен поэзияның рухы есіп тұрады. Жасандылықтан ада. Көркем сөзбен терең ой айта білу – кезкелген жанның қолынан келе бермейтін өнер болса, жас ақын Ерік Омарғалиев осы биікті бағындыра алған екен.

         Мен Еріктің топтама өлеңдерін оқи отырып, ақындар еліне тағы бір тамаша талант иесінің келгеніне қуандым. Өйткені, оның өлеңдерінен шынайылықтың лебі еседі, жыр жолдарынан мөлдір сезім мен соны образ аңдалады. Бүгінгі өміріміздің күнгейі мен көлеңкесін, адамдар арасындағы қатынастың ішкі иірімдерін нәзік нақышпен, ақындық түйсікпен жырлай біледі. Бұл — ақын үшін басты қасиеттің бірі.

Өлең – шексіз, ақиқат ғұмыр – шексіз,
Неге өлімді ойлаймыз, түңілсек біз?!
Ай сүтіндей түндердің аясында
Күн саумалды күндердің мыңын өткіз, — деп жырлайды ақын.

        Өмір-өлеңі өзіне күш-қуат беріп, қиындығы мен қызығы мол осынау поэзия әлемінде Ерік ініме «Жұлдызың биік, жолың жарқын болсын, бауырым!» деген ізгі тілек айтқым келеді.

Нұржан ҚУАНТАЙҰЛЫ,
ақын, жазушы, халықаралық «Алаш» әдеби сыйлығының лауреаты.