Қарсыластарының бәрінен басым түсіп, бірінші орынды иеленді!

      «Ұлы Жеңістің 80 жылдығы» және «Астана күніне» орай Келес ауданының Бесқұбыр елді мекенінде волейболдан жергілікті атқарушы органдардың бірінші басшыларынан құралған командалар арасында Келес ауданының ашық біріншілігі өтті.

      Осы аталған спорттық іс-шара – мемлекеттік қызметкерлер арасындағы серіктестік пен салауатты өмір салтын насихаттауға бағытталған маңызды бастама болды. Сондай-ақ бұл жарысқа Қазығұрт, Сарыағаш, Келес, Шардара, Мақтарал және Жетісай аудандарының жергілікті атқарушы органдарының басшыларынан құралған командалар да қатысып, өз шеберліктерін көрсетті. Әкімдер мен басқарма басшылары алаңда командалық рух пен спорттық шеберліктің үлгісін көрсетті.

        Қызықты да тартысты өткен жарыс барысында Жетісай ауданының әкімдігі мен құқық қорғау құрылымдары құрамындағы команда өз шеберлігімен ерекшеленіп, қарсыластарының бәрінен басым түсіп, бірінші орынды иеленді. Бұл команданың құрамында Жетісай ауданының әкімімен қатар басқа да сала жетекшілері болды. Олар ұйымшылдықты, шапшаңдықты және кәсіби дайындықты жоғары деңгейде көрсетті.

Жарыс қорытындысы бойынша:

• І орын – Жетісай ауданының командасы;

• ІІ орын – Келес ауданының командасы;

• ІІІ орын – Сарыағаш ауданының командасы иеленді.

Сонымен қатар осы жарыс барысында ерекше көзге түскен спортшылар да арнайы марапаттармен марапатталды. Атап айтқанда:

• А. Жүнісбеков – Жетісай ауданының прокуроры;

• А. Өтембаев – Жетісай АБ ҰҚК ТОД басшысы;

• М. Курбанбаев – Жетісай аудандық полиция бөлімі басшысының орынбасары – алаңдағы үздік ойын өрнегі мен командалық үлесі үшін жеке номинациялар бойынша ұлықталды.

             Бұл спорттық іс-шара тек жарыс қана емес, мемлекеттік қызметкерлер арасында достық пен серіктестікті нығайтатын маңызды алаңға айналды. Мұндай іс-шаралар қызметкерлер арасында ынтымақтастық пен салауатты өмір салтын насихаттап қана қоймай, ел ішінде спорттық мәдениеттің дамуына да өз үлесін қосуда.

С. ЖҮНІСБЕКОВ.