САЙЫПҚЫРАН.KZ Ақпаратты-сараптамалық порталы АҚПАРАТ ӘЛЕМДІ БИЛЕЙДІ!
Туған перзенті мен ата-анасына тасбауыр перзенттердің кесірінен бүгінде елде жетімдер үйі де, қарттар үйі көбейген. Бұл бүгінгі күннің ащы шындығы. Олардың тағдыры мен болашағы бұлыңғырланып, психикасына салмақ түскен сәттерде олар үшін кез-келген қолдау, көмек, көңіл бөлу маңызды.
Әрине, жетімдер үйі барлық мемлекеттерде бар болғанымен біздің қазақ ежелден жетімін қаңғыртпаған, жесірін тентіретпеген халық. Тек жеке бастың ғана емес, қоғамның қасіреті болған бұл құбылыстар жас шыбықтың буыны бекімей жатып тағдырдың кермек дәмін татуға, қатыгездік пен зорлық-зомбылыққа душар ететін сәттері де жиі кездеседі. Міне, осындай психологиялық дағдарыстарды болдырмау, алдын алу мақсатында мемлекет пен қолы ашық жомарт жандар сан түрлі әлеуметтік, қайырымдылық шараларын жүзеге асырып келеді. Әйтсе де, ата-ананың орнын ешкімнің баса алмайтыны тағы да шындық.
Аудандағы жастар саясатының жүйелі жүзеге асуымен қатар қайырымдылық шараларынан да қалыс қалмайтын Жетісай ауданы ішкі саясат бөлімінің “Жастар ресурстық орталығы” КММ қызметкерлері мен ауданның ерікті жастары Түркістан облысы, Сайрам ауданындағы “Бауыржан” отбасы үлгісіндегі балалар ауылы” коммуналдық мемлекеттік мекемесінде болды. Аталмыш орталықта тәрбиеленіп жатқан 49 бүлдіршінге қыстық киімдер мен азық-түлік, тәттілер тарту етті. Көңілдеріне қуаныш сыйлады.
“Жарық дүниеге келе салысымен тағдырдың тезгісіне түскен іні-қарындастарымыздың көңіліне қуаныш, жүректеріне демеу болуды азаматтық парызымыз санадық. Бұл – өмір, бұл – тағдыр. Адам баласы тағдырына таңдау жасай алмайды. Сондықтан, біз бір-бірімізге демеу, қорған болуымыз керек” деді өз сөзінде Жетісай жастарының көшбасшысы Нұрлыбек Мутаев.
Қамкөңіл балалармен кездесуде жұбаныш сөздерімен демеу болған Жетісай жастары алдағы уақытта да жиі хабар алып тұруға уәде берді.
Жетісай аудандық Ішкі саясат бөлімі.
