«ҚОС БҰРЫМ» – ҰРПАҚ ТӘРБИЕСІНІҢ ҮЗІЛМЕС АРҚАУЫ

          Қыз баланың тәрбиесі – ұлт болашағының негізі. Қазақ халқы ұл мен қыз тәрбиесіне ерекше көңіл бөлген, әсіресе қыз баланы ізеттілікке, инабаттылыққа, сұлулық пен тәртіпке баулыған. Осы орайда, «Біртұтас тәрбие» бағдарламасы аясында балабақшамызда «Аналар мектебі» бағыты бойынша «Қос бұрым» атты іс-шара өткізілді.

         Бұл шараның негізгі мақсаты – отбасы құндылықтарын сақтау, аналардың қыз тәрбиесіндегі жауапкершілігін арттыру, сонымен қатар аналар мен балалар арасындағы байланысты нығайту. Шара барысында аналар мен қыздары бірге уақыт өткізіп, қазақ халқының дәстүрлі қыз тәрбиесінің бір бөлшегі саналатын шаш өру өнерін үйреніп, тәжірибе алмасты.

        Шаш – қыз баланың көркі. Бұрынғы аналар қыздарының бұрымын сүмбіледей етіп өсіріп, оған ерекше күтім жасаған. Бүгінде бұл дәстүр ұмыт қалмауы үшін «Қос бұрым» шарасында аналар қыздарына шаш өрудің түрлі әдістерін үйретіп, олардың әдемілігін, ұқыптылығын сақтауға дағдыландырды. Сонымен қатар, әжелеріміз бен аналарымыз шаш өрудің тәрбиелік мәні туралы әңгімелер айтып, қазақтың байырғы салт-дәстүрін дәріптеді.

        Тәрбиелік іс-шарамыз өте жылы әрі әсерлі өтті. Балалар аналарымен бірге уақыт өткізіп қана қоймай, ұлттық тәрбие мен әдеміліктің үйлесімін сезінді. Бұл шара болашақта да өз жалғасын тауып, қыз бала тәрбиесіне деген жанашырлық пен жауапкершілікті арттыруға өз үлесін қоса бермек.

       Біз, осындай дәстүрлі құндылықтарымызды жаңғырту арқылы ұрпақ тәрбиесінің іргетасын бекітетініміз анық.

Дилфуза АЗИМОВА,

“Аянат-сұлу” бөбекжай балабақшасы  ЖШС-нің тәрбиешісі.

Жетісай ауданы.