САЙЫПҚЫРАН.KZ Ақпаратты-сараптамалық порталы АҚПАРАТ ӘЛЕМДІ БИЛЕЙДІ!
Түркістан қаласында өткен «Алтын күз – 2020» салтанатты шарасында Мақтаарал ауданының әкімі Бақыт Асановқа өсімдік шаруашылығы өнімдерін экспорттаудан және ауыл шаруашылығы техникаларын жаңалаудан озат аудан номинациялары бойынша марапат табысталды-деп хабарлайды Мақтаарал ауданы әкімдігінің баспасөз қызметі.
Мақтаарал ауданында 2020 жылдың 10 айында жалпы ауыл шаруашылығы өнімінің көлемі 43,8 миллиард теңгеден асты. Мақтааралдық диқандар 60,9 мың гектар жерге егістік ексе, оның басым бөлігін –38,2 мың гектары мақта дақылы құрап, осы алқаптардан 96,5 мың тонна «ақ алтын» жиналған. Соның арқасында аудан мақта дақылын жинау бойынша облыста алдыңғы қатарларға шықты.
Биыл ауданда 46,3 мың тонна көкөніс, 304,1 мың тонна бақша өнімдері өндіріліп, оның 80 пайызына жуығы шет мемлекеттерге экспортталыпты. Сондай-ақ, 11,8 мың тонна күріш дақылы да жиналып алынған.
2020 жылы ауданда 98 дана ауыл шаруашылығы техникасын жаңадан сатып алу көзделсе, есепті кезеңде 102 техника алынып, жоспар артығымен орындалған. Сондай-ақ, жылыжайлардың көлемін 10 гектарға көбейту жоспарланса, 10 айдың ішінде ол жоспар толық жүзеге асқан. Тамшылатып суғару әдісін 250 гектарға көбейту межеленсе, есепті кезең ішінде бұл әдіс 174 гектар жерге ендірілген. Сонымен бірге, 2020 жылы 32 бірлік мал бордақылау алаңы, 8 шағын жанұялық сүт ауласы құрылып, ағымдағы жылдың 10 айында белгіленген тапсырмалар толығымен орындалып отыр.
