АУДАН ӘКІМІ АЛТЫН ҚҰРСАҚТЫ АНАЛАРДЫ ҚҰТТЫҚТАДЫ

            Жетісай ауданында 8 наурыз – Халықаралық әйелдер күніне арналған мерекелік іс-шаралар ғасыр жасаған әжелерімізді құттықтаумен жалғасты. Аудан әкімі Серік Үсенұлы 100-ден асқан әжелердің үйлеріне барып, арнайы құттықтады.

              Бір қолмен әлемді, бір қолмен бесікті тербеткен кешегі Кеңес дәуірін көріп, ғасырды артта қалдырған аналар қатары қазіргі таңда саусақпен санарлық. Киелі, қасиетті де қастерлі болған аналар тіршіліктің бастауы. Өйткені, ел билеген патша да, аты жер жарған алып батыр да, қара сөздің қаймағын ішкен ақын да ананың алтын құрсағынан бастау алады емес пе?

           «Сіздерді жайма шуақ көк желекті көктеммен бірге көңілге қуаныш сыйлай келетін 8 наурыз – Халықаралық әйелдер, қыз-келіншектер күнімен шын жүректен құттықтаймын!
Бұл күнді ақ самайлы асыл әжелерімізден бастап, күлімдеген қаракөз жас жеткіншектерімізге дейін асыға күтетіні анық. Әр үйдің, жанұяның, Отанның мерейі мен ұйытқысы болып табылатын әйелдер қауымына айтарымыз тек алғыс» делінген аудан әкімінің құттықтауында.

            «Жасы үлкенді қаділесе құт болар, Қадірлі кісі қартаймас» деп ұлы ғұламалар өсиет етіп келер ұрпаққа қалдырғандай жақсылықты жанымен қолдап, өнегелі іске сергектік пен ден қойып отырған Қарақай ауылдық округінің тұрғыны Угнай Бегбаева, Жаңа ауыл ауылдық округінің тұрғыны Уримай Байгабекова, Ж.Ералиев ауылдық округінің тұрғыны Сапия Қондыбаева мен Мақталы ауылдық округінің тұрғыны Сұлуай Сапарбаева ауыл тұрғындарының тұтастық өмірінің өзекті мәніне айналған. «Ауылыңда кімің бар?» дегенде көнекөз қарттарын, әсіресе, бәйтерек сынды бетке ұстар қазыналы қарттарын үлкен-кіші марқайып, мақтан етеді. Белі қатып, бұғанасы бекімей жатып тың игеруге қатысып, кейіннен екінші дүниежүзілік соғыста қан майдандағы жауынгерлерге қолынан келгенше көмек берген әжейлер соғыстан кейінгі жылдары тұралап қалған ауылдарды қалпына келтіру ісіне атсалысқан. Қолына кетпен алып шабық шауып, масақ терген. Диірменде ұн өткізіп, мал да баққан. Адал еңбегінің арқасында елдің құрметіне бөленіп, кеңес дәуірінде өмір бойы колхозда қарапайым жұмысшы болып, белі талмай еңбек еткен қарияның өмір жолы көпке үлгі боларлықтай.

           «Осындай тоқшылықта, бейбіт елде өмір сүріп жатқан сендер бақытты ұрпақсыңдар ғой. Оқ пен оттың қатері жоқ. Сондықтан, қолда бар құндылықтарды бағалай білу керек. Кезінде аш та болдық, жәутеңдеп үреймен өмір сүрдік. Бүгін міне, өз еркіміз өзімізде. Тәуелсіз елміз. Барымызға қанағат жасап, болашаққа жақсы үміттермен өмір сүре білейік. Қашан да еліміз аман, жұртымыз тыныш болсын» деген қазыналы қарт аналар аудан әкімінің ықыласы мен құрметіне алғыстарын айтып, баталарын берісті.

Бауыржан НАЙМАНОВ, Жетісай ауданы.