ҰЛТТЫҚ ЖЕКПЕ-ЖЕКТЕН ОБЛЫС ЧЕМПИОНАТЫ ӨТТІ

       Түркістан облысы көлемінде ұлттық жекпе-жек өнерін дәріптеу және бұқаралық спортқа деген жастардың қызығушылығын арттырып, кеңінен насихаттай отырып патриоттық тәрбиені күшейту, салауатты өмір салтын насихаттау, балалар мен жасөспірімдер, жастар арасында есірткіге қарсы күресті насихаттау және ауыл жастарын спортқа баулу мақсатында ақпан айының 3 – 5 күні аралығында жекпе-жек спортынан ересектер, жастар және жасөспірімдер арасында Түркістан облысының чемпионаты болып өтті.

       Түркістан облысы ұлттық спорт «Жекпе-жек» федерациясы және Жетісай аудандық мәдениет, тілдерді дамыту, дене шынықтыру және спорт бөлімінің ұйымдастыруымен өткен байрақты бәсекеге Жетісай, Мақтаарал, Сарағаш, Төле би, Келес, Қазығұрт аудандарымен қатар Түркістан қаласынан жасақталған 10 құрама командада 120 спортшы бақ сынасты.

       Шараның салтанатты ашылу рәсімінде ауданның ардагер спортшысы, халықаралық дәрежедегі төреші Бақыт Жаңбырбаев қатысушыларға сәттілік, шын мықтылпрға жеңіс тіледі. Спорттың адам өміріндегі пайдасы мен қоғамдағы маңыздылығы жайлы айтып өтті.

      Жетісай қаласындағы «Мұхаммад-Али» спорт кешенінде тартысты өткен чемпионатта ересектер 15 салмақ бойынша, жастар 18 салмақ бойынша, ал, жасөспірімдер 16 салмақ бойынша өзара мықтыларды анықтады.

      Кәсіби бапкерлердің қазылығымен мәреге жеткен жарыстың қорытындысымен жалпы командалық есепте жүлделі ІІІ орынға Сарыағаш ауданының құрамасы табан тіресе, ІІ орынды Келес ауданының спортшылары, ал, І орынды Жетісай ауданының командасы иеленіп, ұйымдастырушылардың дипломдарымен, медальдарымен марапатталды.

       Айта кетейік, аталмыш жарыста бабы мен бағы қатар шапқан ересектер арасындағы жеңімпаздар 15 – 19 аралығында Шымкент қаласында өтетін, жастар арасындағы жеңімпаздар наурыз айының 8 – 11 аралығында Атырау қаласында өтетін, ал, жасөспірімдер арасынан шыққан жеңімпаздар сәуір айында Тараз қаласында өтетін Қазақстан чемпионаттарында Түркістан облысының намысын қорғайтын болады.

Бауыржан НАЙМАНОВ, Жетісай ауданы.