АУДАН ӘКІМІ АППАРАТ МӘЖІЛІСІНДЕ НАҚТЫ ТАПСЫРМАЛАР БЕРДІ

          Түркістан облысында бірнеше айдан бері жүргізілген табиғи апаттың алдын алу жұмыстарының нәтижесінде шамадан көп жауған қар мен жауыннан келер алапат апатқа жол берілген жоқ.

         Бүгін облыс әкімі Дархан Амангелдіұлының төрағалығымен барлық аудан, қала әкімдерінің онлайн қатысуымен аппарат жиыны болып, онда атқарылған жұмыстар мен атқарылар істердің барысы талқыланды.

         Апаттың алдын алу бойынша облыс әкімінің тапсырмасын орындау мақсатында Жетісай ауданының әкімі Серік Үсенұлының жетекшілігімен арнайы штаб құрылып, аудан аумағында су тасқынына қарсы жұмыс күшейтілген болатын. Жағдай тұрақты талқыланып, қала, кент, ауылдық округ әкімдеріне нақты міндеттер жүктелді. Ауа райының алдын ала болжамы назарға алынып, қауіпсіздік шаралары нығайтылып, арықтар мен атыздар, каналдар тазаланды. Техника мен төтенше жағдай саласы мамандары, жекелеген құрамдар дайындыққа келтірілді. Соның нәтижесінде ауданда елді мекендер мен тұрғын үйлерді су басу қауіпі сейілді.

           «Биылғы жылғы метеожағдайға байланысты атқарылған алдын алу жұмыстарының нәтижесінде қауіп сейілді. Бірақ, толықтай жойылды деп айта алмаймыз. Әлі де жағдайды назардан тыс қалдыруға болмайды.  Сіз бен біздің жұмысымыздың нәтижесі – тұрғындардың қауіпсіздігімен өлшенеді. Бұл жағдайда сабыр керек. Ең бастысы, ел аман. Жағдай бақыланып, тиісті жұмыстар әлі де атқарылып жатыр» деген аудан басшысы аудандағы ирригациялық жүйелер мен каналдарды толығымен тазартуды, елді мекендердегі жағдайды бақылауда ұстауды тапсырды.

Бауыржан НАЙМАНОВ, Жетісай ауданы.