ДАРЫННЫҢ ДАРАБОЗДАРЫ ҮМІТТІ АҚТАДЫ

        Тарыдай болып кірген күннен бастап мектеп қабырғасында сіздің еркелігіңізді көтеретін де, қателіктеріңізді кешіретін де, сабақ бере отырып сүйіспеншілікке баурайтын да, махаббатқа тәрбиелейтін де, өмір сүрудің қыр-сырын үйрететін де ұстаздар қауымы. Таудай болып шыққан күніңізде де талабыңызға тілекші болып отыратын тағы да осы ұстаз.

       Ұстаздардың еңбегін ұлы ететін өздері емес, шәкірті. Білім нәрімен сусындатып, үйретуден талмаған ұстаздың сан жылдар бойғы еңбегінің жемісі – аяулы әрі білімді шәкірт. Білім бәйгесінен оза шауып, мыңнан тұлпар, жүзден жүйрік келген шәкірт үшін ұстаздың қуанышы сіз бен бізге елестетуге келмейтін сезім.

        Осыдан 10 жыл бұрын жұмысын бастаған «Жетісай ауданының мамандандырылған «Дарын» мектеп-интернаты» өткен оқу жылын керемет көрсеткіштермен тәмамдаған болатын.

        «Мұғалім еңбегінің жемісі жылдар өте келе өз нәтижесін береді» деген қағидаға сүйене отырып еңбек ететін білім ұясынан қанат қаққан 54 бітірушінің 14-і «Алтын белгі» иегері атанса, 17 түлек «Үздік аттестат» алған. Ұлттық бірыңғай тестілеуге де 100 пайыз қатысып, орташа балл 115,6 болған.

        Тағы бір мақтанарлық жағдай – мектеп бітіруші 54 түлектің 52-сі мемлекеттік грант иегері атанып отыр.

        Айта кетейік, аталмыш мектеп-интернатын 10 ішінде аяқтаған 345 оқушының 328 түлегі мемлекеттік білім грант иегері атанса, 138 бітіруші «Алтын белгі», 68 бітіруші «Үздік аттестат» алған.
Түлектерінің 44-і Халықаралық университеттерде, 12-сі шет елдердің жоғары оқу орындарында, 176 бітіруші ұлттық университеттерде, 117 шәкірті мемлекеттік университеттерде білім алып, оқуды аяқтағандары өз мамандықтары бойынша жұмыс жасауда.
««Дарын» мектеп-интернатының дамуы мен көркеюі, білім сапасының артуы мектеп ұжымының, ұстаздарымыздың біргелікте жұмыс жасауының арқасы деп білемін. Мектебіміздің, шәкірттер мен ұстаздарының алар асуы, шығар шыңы әрқашан жоғары болып, еліміздің өркендеуіне қосар үлесі мол екеніне сенемін» дейді «Жетісай ауданының мамандандырылған «Дарын» мектеп-интернаты» КММ директоры Көбейбек Алиев.

         Білікті басшының бастамасымен мектеп ұжымы да өскелең ұрпақ тәрбиелеудегі өрелі жұмыстары және мемлекеттің гүлденуі жолындағы абыройлы істерінде толымды табыстарға қол жеткізіп, қызығы мен шыжығы қатар жүретін ұстаздық жолдарында өрлеу мен өсуге жете беретіндіктеріне сенімді.

Бауыржан НАЙМАНОВ, 

Жетісай ауданы.