ТӘУЕЛСІЗДІК – ТҰҒЫРЫМ

Биыл бабаларымыз мирас еткен, білектің күші, найзаның ұшымен біріктіріп ел еткен Қазақстан Республикасының Тәуелсіздігіне 30 жыл. Бүгінгі Тәуелсіз Қазақстан – әлемдік аренада өз орнын ойып алған Азия мен Еуропаны мойындата білген рухы биік қайсар елдің мекені. Тәуелсіздігіміздің жарияланғаннан бергі мезгіл ішінде көптеген елеулі табыстарға қол жеткіздік. Бұл Елбасының жүргізген парасатты, көреген саясатының нәтижесі. Еліміздің тыныштығы мен қауіпсіздігінің, көп ұлтты Қазақстан халқының жарастығы мен ынтымақтастығының арқасында болып отыр. Біздің дербес ел болып, уығымызды қадап, шаңырағымызды көтеріп, ерікті еркін мемлекетімізді құрып, Қазақстан Республикасы атанып, көк байрақ туымызды желбіретіп әлемге әйгілі болуымыздың өзі – осы Тәуелсіздікке қол жеткізгеніміздің арқасы. Әр ұлт, әр халық үшін тәуелсіздіктен артық қасиетті де қымбат ештеңе жоқ. Тәуелсіздігіміз тұғырлы болғай! Еліміздің көк байрағы бейбіт аспан астында желбіреп, әлемге таныла берсін!

М.Камалова,
Мақтаарал ауданы тәжік этносының өкілі.