Құрылтай сайлауының маңызы

           Сайлау – азаматтардың ел өміріне араласуының, өз пікірін білдіріп, таңдау жасау мүмкіндігінің маңызды тетігі. Ал Құрылтай сайлауы – қоғамның өзекті мәселелерін талқылап, халықтың талап-тілегін билік пен қоғамдық институттарға жеткізетін өкілдерді таңдаудағы маңызды қадам.

         Құрылтайдың жұмысы ел дамуының маңызды бағыттарына қатысты қоғамдық пікірді қалыптастыруға, азаматтардың ұсыныс-пікірлерін ескеруге мүмкіндік береді. Сондықтан сайлауда таңдалатын әрбір өкілдің білімі, тәжірибесі, ел алдындағы жауапкершілігі мен халықтың мұң-мұқтажын түсінуі айрықша мәнге ие.

          Қоғамның дамуы тек мемлекеттік органдардың жұмысына ғана емес, азаматтардың белсенділігіне де байланысты. Өз таңдауын білдіру арқылы әр азамат ел болашағына деген азаматтық ұстанымын көрсетеді. Осы тұрғыдан алғанда, Құрылтай сайлауына қатысу – жай ғана дауыс беру емес, қоғамдық өмірге белсенді араласудың көрінісі.

        Сайлаушы өз таңдауын жасағанда кандидаттардың ұстанымдары мен ұсыныстарын саралап, ел мен жердің мүддесін жоғары қоятын, халықтың сөзін тыңдай білетін азаматтарға қолдау көрсетуі маңызды. Саналы таңдау – жауапты қоғамның басты белгілерінің бірі. Әсіресе жастардың сайлау үдерісіне белсенді қатысуы маңызды. Өйткені елдің ертеңі – бүгінгі жас ұрпақтың қолында. Жастардың қоғамдық мәселелерге қызығушылығы артып, азаматтық жауапкершілігі қалыптасқан сайын қоғам да жаңа серпін алады.

    Қорыта айтсақ, Құрылтай сайлауы – халықтың өз өкілдерін таңдауы арқылы елдің қоғамдық өміріне ықпал етуінің бір мүмкіндігі. Сондықтан әр азамат өз құқығын пайдаланып, сайлауға белсенді қатысқаны жөн.

Жәнібек СЕЙТЖАНОВ,

Мақтаарал ауданы.