САЙЛАУҒА БЕЛСЕНЕ ҚАТЫСАЙЫҚ!

          23 тамызда өтетін Құрылтай сайлауы – ел болашағына бейжай қарамайтын әр азаматтың өз таңдауын білдіретін маңызды қоғамдық үдеріс. Сондықтан сайлауға қатысу – азаматтық жауапкершіліктің көрінісі, ел тағдырына деген жанашырлықтың белгісі.

          Қоғамның дамуы мен елдің келешегі әр азаматтың белсенді ұстанымынан басталады. Ал сайлау – халықтың өз пікірін білдіріп, таңдаған өкілдеріне сенім артуына мүмкіндік беретін демократиялық тетік. Бүгінде елімізде азаматтардың сайлау құқығын жүзеге асыруына барлық жағдай жасалған. Әрбір сайлаушы өз таңдауын заң талаптарына сәйкес еркін әрі жауапкершілікпен жасауға мүмкіндік алады. Осы орайда сайлау науқанына немқұрайлы қарамай, өз азаматтық құқығымызды пайдалану – баршамызға ортақ міндет.

       Сайлауға қатысу дегеніміз – тек дауыс беру жәшігіне барып, таңдау жасау ғана емес. Бұл – елдегі қоғамдық өзгерістерге деген көзқарасты білдіру, болашаққа деген жауапкершілікті сезіну. Әрбір дауыс – азаматтың өз ұстанымын білдіретін ерікті таңдауы. Әсіресе, жас буынның сайлау үдерісіне белсенді араласуының маңызы зор. Өйткені бүгінгі жастар – ертеңгі елдің тізгінін ұстайтын буын. Олардың қоғамдық өмірге араласуы, өз құқықтары мен міндеттерін білуі, ел дамуына қатысты мәселелерге бейжай қарамауы – мемлекет болашағы үшін маңызды.Сондықтан әрбір азамат кандидаттар мен олардың бағдарламалары жөніндегі ақпаратпен танысып, өз таңдауын саналы түрде жасағаны жөн. Ең бастысы – дауыс беру кезінде заң талаптарын сақтау, өз таңдауын ешкімнің қысымынсыз және еркін білдіру.

        Елдің ертеңі – бүгінгі таңдаудан басталады. Бір адамның дауысы аз көрінуі мүмкін. Алайда, миллиондаған азаматтың ортақ таңдауы елдің қоғамдық-саяси бағытына әсер ететін маңызды күшке айналады. Сол себепті де еліміз үшін маңызы ерекше алдағы сайлау күні әр азамат өз азаматтық құқығын пайдаланып, ел болашағына қатысты маңызды шешімге өз үлесін қосқаны дұрыс.

Сәбит АСАНОВ,

Мақтаарал ауданы.