Құрылтай сайлауына белсене қатысайық!

       Сайлау – ел болашағына бейжай қарамайтын әр азаматтың қоғамдық жауапкершілігін танытатын маңызды үдеріс. Алдағы 23 тамызда өтетін Құрылтай сайлауына белсенді қатысу – елдің ертеңіне деген азаматтық ұстанымымызды білдірудің бір жолы.

       Қоғамның дамуы мен елдің болашағы әрбір азаматтың белсенділігіне тікелей байланысты. Мемлекет үшін маңызды шешімдердің қабылдануына халықтың ой-пікірі мен таңдауы әсер етеді. Сондықтан сайлау науқанына қатысу – тек дауыс беру ғана емес, ел өміріне араласудың, өз ұстанымыңды білдірудің нақты мүмкіндігі.

       Құрылтай сайлауы – азаматтардың қоғамдық мәселелерге қатысты көзқарасын білдіріп, ел дамуына үлес қосатын өкілдерді таңдауға мүмкіндік беретін маңызды саяси науқан. Осы орайда әрбір сайлаушы өз таңдауына жауапкершілікпен қарап, кандидаттардың бағдарламалары мен ұстанымдарымен танысып, саналы шешім қабылдағаны жөн.

       Дауыс беру құқығы – азаматқа берілген үлкен мүмкіндік. Оны пайдалану арқылы әр адам өз пікірін білдіреді. Бір адамның дауысы елеусіз көрінгенімен, ел көлемінде әр азаматтың таңдауы қосылып, ортақ нәтижені қалыптастырады. Сондықтан «Менің дауысымнан не өзгереді?» деген түсініктен арылып, керісінше, «Менің таңдауым ел болашағына қандай үлес қоса алады?» деген жауапкершілікпен қараған абзал.

       Сайлауға қатысу – елдік іске атсалысудың бір көрінісі. Әсіресе жастардың қоғамдық-саяси өмірге белсенді араласуы – мемлекетіміздің демократиялық құндылықтарын нығайтып, азаматтық жауапкершілікті арттыруға ықпал етеді. Өйткені бүгінгі таңдау – ертеңгі қоғамның келбетіне әсер етеді.

         Әр азамат сайлау күні өз учаскесіне барып, заңда белгіленген тәртіппен дауыс беруге мүмкіндігін пайдалануы қажет. Таңдау жасау кезінде жеке мүддеден гөрі елдің, қоғамның және келешек ұрпақтың мүддесін ойлағанымыз маңызды.

Қыдырбек Майра Рысбекқызы,

Мақтаарал ауданы.