АЗАМАТТЫҚ БЕЛСЕНДІЛІК – КЕМЕЛ ҚОҒАМНЫҢ КЕПІЛІ

         Қай елдің болсын болашағы оның азаматтарының жауапкершілігі мен белсенділігіне байланысты. Әрбір адамның қоғам өміріне араласуы, мемлекет дамуына өз үлесін қосуы – өркениетті елдің басты белгілерінің бірі. Осындай жауапты қадамның бірі – сайлауға қатысып өз еркін білдіру болып табылады.

          23 тамыз күні елімізде өтетін сайлау – әрбір азаматтың өз таңдауын жасап, елдің ертеңіне деген көзқарасын білдіретін маңызды саяси науқан. Бұл – Конституциямен кепілдендірілген құқықты жүзеге асыру ғана емес, мемлекет тағдырына бейжай қарамайтын азаматтық ұстанымның айқын көрінісі.

         Еліміздің тұрақты дамуы, қоғамдық келісімнің нығаюы және халықтың әл-ауқатының артуы – баршамызға ортақ мақсат. Осы жолда әр азаматтың дауысы маңызды. Себебі мемлекет болашағы тек мемлекеттік органдардың ғана емес, бүкіл қоғамның ортақ жауапкершілігі арқылы қалыптасады.

         Қазақ халқы қашанда бірлік пен ынтымақты жоғары бағалаған. «Кеңесіп пішкен тон келте болмас» деген халық даналығы көпшіліктің ортақ шешімінің қадірін көрсетеді. Сайлау да – көпшіліктің еркін білдіретін, елдің болашағын айқындайтын маңызды үдеріс. Сондықтан бұл науқанға саналы түрде қатысу – әр азаматтың парызы.

         Әсіресе, жастардың қоғамдық өмірге белсенді араласуы ерекше мәнге ие. Себебі бүгінгі шешім – ертеңгі ұрпақтың өміріне әсер етеді. Өз еліне жанашыр азамат ешқашан ел тағдырына немқұрайлы қарамайды. Ол қоғамдағы өзгерістерге бейжай қарамай, өзінің азаматтық ұстанымын нақты ісімен көрсетеді.

          23 тамыздағы сайлау заң талаптарына сәйкес ашықтық, әділдік және жариялылық қағидаттары негізінде өтеді. Әрбір сайлаушы өз таңдауын ешқандай қысымсыз, еркін түрде жасауға мүмкіндік алады. Сол мүмкіндікті тиімді пайдаланайық!

Ағман ҚҰСАЙЫН,

Мақтаарал ауданы.