«ТАРИХ ТАРТУЫ — ТӘУЕЛСІЗДІК» КВИЗ САЙЫСЫ ҰЙЫМДАСТЫРЫЛДЫ

        Бүгін, Абай облысы, Семей қаласында, «Тарих тартуы — Тәуелсіздік» тақырыбында «Ауыл» партиясы Абай облысы бойынша өңірлік филиалының қолдауымен »Семей қаласының орталық кітапханасының» ұйымдастыруымен өңірдегі бірқатар мемлекеттік және білім ордалары мен мәдени мекемелер ұжымының қатысуымен тамаша тартысты интеллектуалдық ойын өтті.

        Оған атап айтқанда: Семейдегі»36803 әскери бөлімі»,»АК — 74″ — «Абай атындағы облыстық әмбебап кітапханасы», «Әскери полиция бөлімі»,»Ұстаздар» командасы — «Шәкәрім университеті, Ф.М.Достоевский музейі, «N 27 ЖОББМ», «Құрама» команда — «Семей қаласының орталық кітапханасы», «Tau Found» — «Жас Абай» мектебі өкілдері қатысып, білім мен ұшқырлық деңгейінде өзара 6 команда бақ сынасты.

       Шара шымылдығы әнші-сазгер Екпін Мұратұлы Шүршітбаевтың орындауындағы тағылымды әнмен ашылып, артынша мереке аясында жырдан маржан шашып, ұлттық рухты одан әрі асқақтата түсті. Ал, жас айтыскер ақын «М.О.Әуезов атындағы педагогикалық колледжінің», «Қазақ тілі мен әдебиеті» пәнінің мұғалімі мамандығының 1-курс студенті Рауан Нұроллаевтың Тәуелсіздікке арналған Арнау жыры кештің мазмұн ажарын енгізді.

          Сайыс арасында, «М.Төлебаев атындағы музыкалық колледждің» жас дарын Социал Ердәулеттің орындауында Хакім Абайдың «Көзімнің қарасы», «Сегізаяқ» әндері шырқалып, көпшілікті тәнті етті.

           Ескере білсек, бұл күн өте маңызды күн. Қазақстан халқы үшін 16 желтоқсан – елдің ең қастерлі мерекелерінің бірі. Бұл күн тек тәуелсіздіктің ақ таңы ғана емес, сонымен бірге елдігімізді, рухымызды қайта жаңғыртқан тарихи белес. Осы мерекеге орай Семей қаласының орталық кітапханасында ерекше мазмұнды шара өткізілгені көңіл қуантарлық дүние.

         Айта кетейік, бүгінгі кештің ерекшелігі – қоғамда ел азаматтарының өз тарихына деген ықыласын арттыруға бағытталғандығында. Мысалға Квиздің әр кезеңі Ұлы Даланың өткені мен бүгінін сабақтастырғандай әсер бөлегендігі. Қатысушылар тәуелсіздікке қатысты тарихи сұрақтарға жауап беріп, тұлғалардың дауыстары мен тарихи фильм үзінділерін таныды, сондай-ақ ұлттық рәміздер мен көрнекті қайраткерлерді фотосурет арқылы анықтады.

       Сайыс соңында, «Ауыл» партиясы Абай облысы бойынша өңірлік филиалының өкілі Омарғалиев Ерік Қайратбекұлы сөз алып, алдымен, барша елді ұлық мерекеміз — »Тәуелсіздік күнімен» құттықтап, барлық ұйымдастыру алқасы пен қатысушыларға алғыс білдіре отырып, үздік атанған командаларды марапаттады.

       Жүлделі орындар: I орын Дипломы — (бағалы сыйлық): «Ұстаздар» командасы — «Шәкәрім университеті, Ф.М.Достоевский музейі, «№ 27 ЖОББМ».   II орын Дипломы — (бағалы сыйлық): «АК — 74» — «Абай атындағы облыстық әмбебап кітапханасы».  III орын Дипломы — (бағалы сыйлық): «№36803 әскери бөлімі».

      Қалған барлық қатысушы командаларға «Алғыс хат» табысталып, арнайы сыйлықтар ұсынылды.

      Шара, естелік фотосуретке түсумен, алғысты да рухты сипатта тәмамдалды. Бүгінгі буынның тарихи санасы тереңдеген сайын, мемлекеттің ертеңі де нығая түсері анық. «ТАРИХ ТАРТУЫ – ТӘУЕЛСІЗДІК» шарасы — міне, соның жарқын дәлелі.

«Ауыл» партиясы Абай облысы бойынша өңірлік филиалының баспасөз қызметі.