ҚАУІПСІЗ БАЛАЛЫҚ ШАҚ – БАРШАМЫЗҒА ОРТАҚ МІНДЕТ

         Қоғамның тұрақтылығы мен ел болашағының кепілі – жас ұрпақтың амандығы мен қауіпсіздігі. Сондықтан да балалар арасындағы құқықбұзушылықтың алдын алу – мемлекет пен қоғам үшін маңызды міндеттердің бірі. Осы бағытта Түркістан облысы прокуратурасы тарапынан арнайы «Қауіпсіз балалық шақ» концепциясы әзірленіп, өңір мектептерінде жүйелі түрде іске асырылып келеді.

         Түркістан облысы прокурорының орынбасары Дәулет Тлемисов Жетісай ауданына арнайы іс-сапармен келіп, осы концепция аясында жүзеге асып жатқан жұмыстардың барысымен танысты. Ол мектеп директорларымен, кәмелетке толмағандардың ісі жөніндегі полиция инспекторларымен кездесіп, бір ай көлемінде атқарылған істерге баға беріп, шешімін қажет ететін өзекті мәселелерді талқылады. Ауданымыздағы мектеп директорлары мен полиция инспекторлары да өз ұсыныстарын ортаға салып, тәжірибе алмасуға мүмкіндік алды.

        Жиын барысында Түркістан облысы прокурорының орынбасары қоғамдағы өзекті проблемалар – буллинг, кибербуллинг, лудомания, интернет алаяқтық, әлімжеттік пен жыныстық тиіспеушілік сынды құқықбұзушылықтардың алдын алу ісінде әрбір азаматтың рөлі зор екенін атап өтті. Сондай-ақ, ол аудан прокуратурасына  аталған концепцияның орындалу барысын тұрақты түрде қадағалап, облыс прокуратурасына ақпарат беріп отыруды тапсырды.

         Кездесу соңында Дәулет Бекбашұлы балалар мен жасөспірімдер арасындағы құқықбұзушылық пен зорлық-зомбылықтың алдын алу – бүгінгі қоғам алдындағы ең өзекті мәселе екенін айтып, бұл бағыттағы жұмыстардың облыс прокуратурасының тұрақты бақылауында болатынын жеткізді.