ҚАЛАДА ЖОЛ ҚАУІПСІЗДІГІНЕ АРНАЛҒАН РЕЙДТІК ШАРА ӨТТІ

         Жетісай қаласындағы басты көшелердің бірі – Мұхтар Әуезов көшесінде жол қауіпсіздігін қамтамасыз ету мақсатында бір нүктелік рейдтік іс-шарасы ұйымдастырылды.  Аталмыш рейдтің басты мақсаты – жол-көлік оқиғаларының алдын алу, жүргізушілердің құжаттарын тексеру және көлік жүргізу мәдениетін арттыруға бағытталған түсіндірме жұмыстарын жүргізу болды.

           Іс-шараға Жетісай аудандық полиция бөлімі басшысының орынбасары Нұрсұлтан Елшібаев тікелей қатысты. Ол жүргізушілерге жолдағы қауіпсіздікке байланысты ескертулер жасап, түсіндірме сөз сөйлеп: «Құрметті көлік жүргізушілері! Жол ережесін сақтау – әрбіріміздің міндетіміз. Сіздердің тәртіп пен қауіпсіздікке деген жауапкершіліктеріңіз өз өмірлеріңізбен қатар, айналадағы жаяу жүргіншілердің де өмірін сақтайды. Сол себепті көлікті тек құжаттарыңыз толық болған жағдайда жүргізіп, қашанда жол ережесін сақтап жүрейік», – деді Елшібаев.

        Рейдтік шара барысында полиция қызметкерлері жүргізушілерге қауіпсіздік белдігін тағудың, жылдамдықты асырмаудың, жол белгілерін қатаң сақтаудың маңызы туралы кеңінен түсіндірді.

        Жол қауіпсіздігі – қоғам үшін аса маңызды. Сондықтан полиция қызметкерлері мұндай іс-шараларды тұрақты түрде өткізіп тұратын болады.

Сатыбалды ЖҮНІСБЕКОВ,

Жетісай ауданы.