«РУХЫ ТАЗА ЕЛ» – ЖАС ЕРІКТІЛЕР ҚАЛАЛЫҚ СЕНБІЛІККЕ АТСАЛЫСУДА

         Абай облысы – қасиетті Семей топырағы  қашанда елдік пен руханияттың ұйытқысы болып келгені белгілі. Бүгінде, бұл өңірдің жастары да өнегелі жолды жалғап, қоғамның дамуына өз үлестерін қосуды басты міндет санайды. Солардың бірегейі – Медғат Несіпбекұлы, жас болса да азаматтық белсенділігімен көпке үлгі болып жүрген рухты азамат.

       Медғат – Семей қаласының тумасы, спортпен шұғылданатын жас, негізгі мамандығы – заңгер. Ол кәсіби мамандық жолын ғана емес, ел игілігіне қызмет ететін қоғамдық істі де қатар алып жүр. Қазіргі таңда, Медғат – «Рухы таза ел» аталатын жас еріктілер тобының жетекшісі. Бұл бастама – қоғамды тазалыққа, экологиялық мәдениетке, ортақ жауапкершілікке үндейтін маңызды азаматтық қозғалыс.

        Биылғы жылы, Абай облысының әкімі Берік Уәлиұлы өңір жастарын тазалық пен тәртіпке шақырып, әрбір азаматты туған жерін таза ұстауға үндеген болатын… Осы үндеуді қолдаған, Медғат, күн сайын дерлік, әсіресе, әр сенбі сайын қалалық сенбіліктерге қатысып жүр десенк, еш асылық емес!  Ол қасына өзі сияқты белсенді жастарды топтастырып, аула, саябақ, жағалау аумақтарын тазалауға, тұрмыстық қалдықтарды жинауға атсалысып келеді.

       Медғаттың айтуынша, «сенбілік» – тек қоқыс жинау емес, бұл – қоғамдық санаға серпін беретін, адамды жауапкершілікке тәрбиелейтін үлкен іс. «Туған қалаңды, туған жеріңді таза ұстау – әр азаматтың парызы. Біз, жастар, үлкендерден бізге қалған аманатқа адал болуымыз керек», – дейді ол.

        Жас еріктілердің бұл әрекеті Мемлекет басшысы Қасым-Жомарт Тоқаев ұсынған «Таза Қазақстан»ұлттық жобасының да нақты көрінісі. Президент табиғатты аялау, қоршаған ортаны таза ұстау – тек биліктің емес, әрбір қазақстандықтың ортақ міндеті екенін үнемі атап келеді. Медғат Несіпбекұлы осы бастаманы өзінің өмірлік ұстанымына айналдырған. Ол, әр сенбілікке шыққан сайын, әлеуметтік желідегі достарын да шақырып, тазалыққа үндеуді әдетке айналдырғалы қашан?!

       Семейліктер, бүгінгі күні, Медғатты жақсы таниды деп айтуға әбден болады.  Қала тұрғындары оның әрбір ісін әлеуметтік желілер арқылы көріп, қолдау білдіруде… Жастарға үлгі боларлық жігерлі мінезі, адалдығы мен еңбекқорлығы оның патриоттық рухының биік екенін айқындап тұр. Ол үшін отансүйгіштік – тек ұран емес, нақты әрекет!

        Медғаттың күнделікті еңбегі қарапайым көрінгенімен, оның астарында үлкен азаматтық жауапкершілік жатыр. Қала көшелерін тазалау арқылы ол елдің экологиялық мәдениетін көтеріп қана қоймай, жастардың бойына туған жерге деген құрметті сіңіріп те жүр.

        «Рухы таза ел» жас еріктілерінің мақсаты – тек сенбілік ұйымдастыру емес, ұрпақ бойында тазалық мәдениетін қалыптастыру, табиғатты аялауға шақыру! Осы тұрғыда, Медғаттың белсенділігі – бұл мақсаттың жарқын мысалындай. Оның бастамасына қосылған ерікті жастардың саны күн санап артуда. Бұл дегеніміз – қоғамның жаңарып, жаңа буынның жауапкершілікті терең сезіне бастағанының белгісі.

        Медғат Несіпбекұлы – өз ұлтының нағыз жанашыры. Оның әр ісі – туған жерін сүйетін, елінің ертеңіне алаңдайтын нағыз қазақстандық жастың айқын бейнесін танытады.

        Семей қаласының көшелерін тазалап жүрген жас заңгер әрі спортшының осындай ерлікке толы әрекеті көпке үлгі болуы тиіс. Таза қала – таза қоғамның мінсіз айнасы. «Рухы таза ел» – болашағы жарқын ел!

«Сайыпқыран.кз» ақпараттық-сараптамалық порталы.