СЕРІК МАМЫТОВ СУ НЫСАНДАРЫН АРАЛАП, ХАЛЫҚ ПІКІРІН ТЫҢДАДЫ

          Жетісай ауданының әкімі Серік Үсенұлы Мамытов тұрғындармен өткен есептік кездесулер мен жеке қабылдауларда көтерілген ауыз су және санитарлық тазалық мәселелеріне байланысты бірқатар елді мекендерді аралап, ауыз су нысандарының жағдайымен танысты. Аудан басшысы бұл сапарында ауыл ақсақалдарымен де кездесіп, халықтың талап-тілегін назарға алды.

         Аудан әкімінің жұмыс сапары алдымен «Жаңа ауыл» ауылдық округінен басталды. Мұнда орналасқан «Атақоныс», «Жаңа ауыл», «Қарой» және «Ынтымақ» елді мекендеріндегі ауыз су жүйелерінің құрылысы жүргізілуде. Жалпы құны 3,5 млрд. теңгені құрайтын жобаларды «Компания Арай-НС» ЖШС іске асыруда. Мердігер мекеме өкілдері жұмыстардың өндірістік кестеге сәйкес жүріп жатқанын және белгіленген мерзімде толық аяқталатынын мәлімдеді.

         Сапар барысында аудан басшысы Қазыбек би ауылдық округіне қарасты, Құрбан ата елді мекеніндегі жаңадан пайдалануға берілген ауыз су нысанында да болды. Құны 481 млн. теңге болатын бұл нысанды «Exclusive Stroy Corporation» ЖШС салған. Нысан қолданысқа берілгеннен кейін анықталған кемшіліктер мердігер тарапынан қалпына келтірілген.

        Сондай-ақ, аудан әкімі Ш.Ділдәбеков ауылдық округіне қарасты «Байдала» елді мекеніне де ат басын бұрып, ауыл ақсақалдарымен кездесті. Жергілікті тұрғындар ауыз су сапасына қатысты бірқатар сын-ескертпелер айтып, өз ұсыныстарын жеткізді.

         Аудан әкімі Серік Үсенұлы «Халықтың талап-тілегі — біздің жұмысымыздың басты бағдары. Әрбір сын орынды айтылса — нәтиже беруге тиіс. Мәселенің жайын көзбен көріп, жауаптылармен бірлесе отырып шешу — жүйелі жұмыстың көрінісі», — деп, тұрғындар тарапынан көтерілген мәселелерді бақылауға алып, тиісті бөлім басшыларына нақты тапсырмаларды жүктеді.

Өз тілшімізден.