ШЕКАРАҒА ҚАДАМ БАСТЫ

          Мыңжылдықтың ширек ғасырын шекара басқармаларының оқу базаларында қарсы алған «Күз-2024» шақырылымының жас сарбаздарына ел шебіне аттанатын күн де келіп жетті. ҰҚК Шекара қызметі Алматы облысы бойынша шекара басқармаларының техникалық және кәсіби даярлық бөлімдерінде ел шебіне қажет мамандық түрлерін игерген сарбаздарды алыстағы шекара бөлімшелерінің жеке құрамы нан-тұзбен қарсы алып, құрмет көрсетті.  

         «Бұл ән бұрынғы әннен өзгерек» демекші, шекараға жіберілгендерді шекарашылармен бірге жергілікті әкімдіктің өкілдері де бірге күтіп алып, болашақ Отан қалқандарының алдағы қызметтеріне сәттілік тіледі. Лайықты бағасын беру керек, бұл жағынан тағы да Райымбек ауданы бойынша шекара басқармасы дараланды. Өздері үкілеп шығарып салған сарбаздарға арналған салтанатты рәсімге әкімшілік қызметкерлерін тартып, көрегендік танытты.

         …Осылайша, қаңтар айында департаменттің ел шебіндегі бірқатар бөлімшелері жас сарбаздармен толықты. Солардың ішінен даралап айтатын болсақ, Райымбек ауданы бойынша шекара басқармасының «Нарынқол», «Қостөбе», «Текес», «Сүмбе», «Сұңқар» және «Жазық» шекара бөлімшелері осы сәттен бастап, сарбаздардың екінші туған үйіне айналады. Мұнда оларды бірнеше аптаға созылатын «қызметке тарту» дәрістері күтіп тұр. Шекара нарядтарына шығуды үйренген соң сарбаздарға ел шебін күзету секілді маңызды міндет сеніп тапсырылатын болады.

        Тағы бір айта кетерлігі, сарбаздармен тек шекара басқармасының офицерлері жұмыс істеумен шектелмейді. Оларға көмекке шекарашы ардагерлердің «Застава тарландары» республикалық қоғамдық бірлестігінің Алматы облыстық филиалының мүшелері, ҰҚК Әскери полиция өкілдері тартылған. Құзырлы мекменің қызметкерлері «Сарбазды ұрдың – түрмеге отырдың» тақырыбында алдын алу шараларын өткізсе, саналы ғұмырларын ел шебінің сызатсыздығына арнаған ардагерлеріміздің де жастарға айтар ақылы жоқ емес…

         Сонымен, алыстағы шекарашылар өздерінің қатарларын толықтырған жас буынды қалай қарсы алды деген сұраққа келсек.

         – Бүгін бізге 70-ке тарта сарбаз келді. 30-ға жуығы «Қостөбе» шекара бөлімшесінде қызмет атқаратын болады. Қалғандары өздерінің азаматтық борыштарын шекара басқармасының негізгі күші шоғырландырылған «Нарынқол» шекара бөлімшесінде өтейді. Оларды Райымбек ауданы әкімінің орынбасарлары Жанарбек Жақсылық пен Ғалым Жусанбаевтар да бізбен бірге қарсы алып, Нарынқол өңірінің халқы атынан ізгі тілектерін арнады, – дейді «Нарынқол» шекара бөлімі бастығының орынбасары – штаб бастығы майор Руслан Қыдырмолдаұлы бізбен сұхбатында. Рәсімнен кейін шекара бөлімшесінің асханасында сарбаздарға арнап мерекелік дастархан жайылды.

         Иә, шекараның күретамырына қан жүгірді, яғни жас сарбаздармен толықты. Мұнда олар үйренетін нәрсе көп. Ең бастысы, осы өңірдің аяулы перзенті, поэзия мұзбалағы, ақын Мұқағали Мақатаев жырлағандай, олар Отанының шетіне қадам басты. Мұнда тыныштық. Бірақ қауіпті. Сосын да Тоныкөк бабамыз секілді «күн отырмайды, түн ұйықтамайды».  Өйткені, осы жерден күн шығып,  осы жерден таңдары арайлап атады…

Тамара ДӘУЛЕТБАЕВА,

ҰҚК Шекара қызметінің запастағы подполковнигі.