ЗАМАНАУИ ТИІМДІ ТЕХНОЛОГИЯ

          Мемлекет басшысы Қасым-Жомарт Тоқаевтың тапсырмасын орындау аясында Су ресурстары және ирригация министрлігі Ауыл шаруашылығы министрлігімен бірлесіп, су үнемдеу жүйелерін орнату шығындарын субсидиялау мөлшерін 50 пайыздан, 80 пайызға дейін ұлғайтты.  Бұл жеңілдік шаруалардың заманауи суару жүйелерін сатып алу, сондай-ақ соған қатысты қажетті инфрақұрылымды қамтамасыз ету шығындарын өтеуге көмектеседі.

        Биыл Жетісай ауданында заманауи су үнемдеу технологиясын енгізу  арқылы егістікке қажетті ағын су тапшылығын жоюға бағытталған ауқымды жұмыстар жүзеге асырылып жатыр. Осы бағытта аудандағы Абай ауылдық округі, Жүзімдік елді мекеніндегі «Смайл» шаруа қожалығы 55 гектар жерге қытайлық компаниямен бірлесіп су үнемдеу технологиясын енгізген болатын. Жалпы инвестициялық құны 55 миллион  теңгені құрайтын жобаның ерекшелігі – ағын суды 2,5 есеге дейін үнемдеумен қатар, мол өнімге қол жеткізуге мүмкіндік береді. Диқандар гектарына орта есеппен 70 центнерден өнім алуды ниеттеп отыр.

       Бүгінде Жетісай ауданында 1310 гектар жер ағын суды үнемдеу технологиясын қолданады. Жыл соңына дейін оның көлемін 2800 гектарға жеткізу жоспарланып отыр. Ал облысымыз бойынша 32 мың гектарға су үнемдеу технологиясы енгізілсе, 2030 жылға дейін бұл көрсеткішті 216 мың гектарға дейін арттыру көзделуде.

        Атап кетерлігі, 2030 жылдың соңына қарай ҚР Су ресурстары және ирригация министрлігі еліміздегі суармалы жерлердің жалпы көлемінің 50 пайыздан астамын су үнемдеу технологияларымен қамту арқылы жылына 2,1 текше шақырымға дейін су үнемдеуді жоспарлап отыр.

С.ҚУАНЫШБЕК.