АУДАНДА МӘДЕНИЕТ ҮЙЛЕРІ ЖӨНДЕЛІП ЖАТЫР

          Жетісай ауданының әкімі Серік Үсенұлы Мамытов пен аудандық мәслихат төрағасы Медет Қасымов аудандағы күрделі жөндеу жұмыстары жүргізіліп жатқан мәдениет үйлерінде болып, құрылыстардың барысымен танысты.

         Қарақай ауылдық округіне қарасты Сәтпаев елді мекеніндегі 1986 жылы қолданысқа берілгелі жөндеу көрмеген мәдениет үйінің күрделі жөндеу жұмыстары өткен жылдың мамыр айында басталған. 2679,1 шаршы метр аумаққа жүргізілуі тиіс жөндеу жұмыстарының жалпы құны 691 млн 445 мың теңгені құрайды. Келесі жылы қолданысқа берілетін мәдениет үйінде мәдениет үйінің қызметкерлерімен қатар ауылдық кітапхана, спорттың волейбол, футбол және шахмат, ән, күй, би үйірмелері жұмыс істейтін болады. Жөндеуге жауапты «Намыс» ЖШС өкілдері кестеге сәйкес жүргізіліп жатқан жұмыстарға отандық өнімдердің қолданылып жатқанын, жалпы 23 адамның жұмылдырылғанын айтады.

         Сонымен қатар, аудан басшысы Жаңа ауыл ауылдық округі, Мырзашөл елді мекеніндегі мәдениет үйінде де болды. Соңғы 10 жылда қолданыстан шығып қалған мәдениет ошағына облыстық қазынадан қаралған 236 млн 223 мың теңгеге 732,4 шаршы метр аумақта күрделі жөндеу жұмыстары жүргізіледі. 45 жылдан бері алғаш рет жүргізілген жөндеу жұмыстары келесі жылы аяқталып, қолданысқа тапсырылады деп жоспарлануда.

         Аудан басшысы мердігер мекеме «РемСтрой» ЖШС өкілдерімен кездесу барысында аудандық мәдениет, тілдерді дамыту, дене шынықтыру мен спорт бөлімінің басшысы Еркебұлан Сейдалиевке жұмыстың сапасы мен жүргізілу кестесін қатаң бақылауды тапсырды.

          Айта кетейік, бүгінде Жетісай ауданында тұрғындарға тұрақты қызмет көрсетіп келе жатқан 11 мәдениет үйінңң 1-і аудандық, 7-і ауылдық мәдениет үйлері болса, 3-і ауылдық мәдениет клубтары.

Бауыржан НАЙМАНОВ,