АРДАГЕРЛЕРГЕ ҚҰРМЕТ КӨРСЕТІЛДІ

         «Мақтаарал» мәдениет үйінде Кеңес әскерлерінің шектелген контингентінің Ауғанстан Демократиялық Республикасынан шығарылғанына биыл 35 жыл толуына орай салтанатты іс-шара өтті.

         Зұлмат соғыс уақытында майданда ерлікпен көз жұмған қаруластарын бір минут үнсіздікпен еске алумен басталған бұл жиынды – ҚР ҰҚК Шекара қызметінің Түркістан облысы бойынша Департаменті, Мақтаарал ауданы бойынша шекара басқармасының бастшысы, подполковник А.Аяғанов,  Жетісай және Мақтаарал аудандарының қорғаныс істері жөніндегі біріктірілген бөлімінің басшысы, подполковник А.Қабыловтар ашып беріп, ауған соғысы ардагерлерін құттықтап, жұмыстарына табыс тіледі.

       «Ауған соғысының тарихи мағыналық ақиқатын ашу, тәуелсіздік жолында күрескен ағаларымыздың ерлігін кейінгі ұрпаққа үлгі ету, бүгін өзімізбен бірге елінің көсегесін көгертуге атсалысып жүрген ардагер жауынгерлерді қадірлеп, құрметтеу — біздің қасиетті борышымыз!» – деді, Е.Базарбаев. Сондай-ақ, жиында соғыс ардагерлерінің басынан кешкен қиындықтары туралы айтылып, ержүрек ағалардың батырлығы кейінгі ұрпаққа үлгі екені атап өтілді.

         Салтанатты іс-шара барысында ардагерлер мерекелік арнайы төс белгісімен марапатталып, оларға аудан әкімі Б.Асановтың құттықтау хаты табысталды.

        Мерекелік іс-шара мәдениет үйінің өнерпаздары ұйымдастырған концертпен жалғасын тауып, онда өнерпаздармен бірге соғыс ардагерлері де отты жылдардағы әндерді шырқады.

       Шара соңында арнайы дайындалған еске алу асы «Әйгерім» тойханасында берілді.

Өз тілшімізден.