АЛҒЫС АЙТУ – ЕЛ БІРЛІГІН НЫҒАЙТУ

       Аудандық орталықтандырылған кітапханада 1 наурыз – Алғыс айту күніне орай, этнос өкілдерінің қатысуымен дөңгелек үстел жиыны болып өтті.

       Алғыс айту күні – сан түрлі сынақтардан өткен халқымыздың ынтымақ-бірлігін айғақтайтын ерекше күн. Бұл мереке қиын-қыстау уақытта қазақ халқының көрсеткен қамқорлығының ұмытылмайтынын білдіреді. Айтулы мереке халқымыздың тату-тәтті, береке-бірлікте өмір сүруі үшін өте маңызды. Қазіргі таңда Қазақстанда тұрып жатқан 130 дан астам этнос өкілдері бір атаның баласындай егемен елімізді дамытуға, бейбітшілікті, татулық пен келісімді нығайтуға өлшеусіз үлес қосуда. Іс-шара барысында этнос өкілдері тәуелсіз Қазақстандағы бейбіт және гүлденген өмірі үшін өз алғыстарын білдіріп, аудандық кітапхана қызметкерлерінің тақырыпқа сай әзірлеген баяндамалары тыңдалды.

         Сонымен қатар, іс-шара аясында қазақ тілінің қолданыс аясын кеңейту, тіл саясатын іске асыру, қазақ тілінің этносаралық қарым-қатынас тілі ретінде қызметін нығайту мақсатында ақын, ағартушы Сұлтанмахмұт Торайғыров пен Мағжан Жұмабаевтың 130 жылдығына орай өткізілген «Мен қазақша сөйлеймін» акциясын қорытындылап, акция қатысушыларына аудандық «Тілдерді оқыту және дамыту орталығының» басшысы Қ.Рысмахановтың дипломдары мен естелікке сыйлықтары табысталды. Іс-шара соңында жиынға қатысушыларға Алғыс айту күніне арналған кітап көрмесі таныстырылды.

       Ынтымақ пен берекені ұйытқы етіп, ортақ Отанымыздың болашағы үшін бір ниетте еңбек етейік.

Мөлдір БАЛХАШОВА,
Жетісай аудандық » Тілдерді оқыту және дамыту орталығы» КММ әдіскері.