СУ ҚАШЫРТУ ЖҰМЫСТАРЫ ҚАРҚЫНДЫ ЖҮРГІЗІЛУДЕ
Posted by: Қалмұрат
in News, PRESS RELEASE, Әлеумет
01/02/2023
9 Views
Биылғы жылдың басында жауған қалың қар мен ауа-райының күрт жылынуы мен жауын-шашынның толассыз жаууы салдарынан Жетісай ауданына қарасты қала, кент, ауылдық округтердегі тұрғын үйлердің ауласы мен көшелерге жиналған суларды қашырту жұмыстары жүргізілуде.
Аталмыш табиғи қолайсыздыққа байланысты алғашқы күннің өзінде-ақ Жетісай ауданының әкімі Серік Үсенұлының басшылығымен жедел штаб отырысы өткізіліп, жауапты сала басшыларына тиісті тапсырмалар берілген болатын.
Жергілікті әкімдіктерден 200 ден астам жеке құрам және еріктілер, 37 техника, 64 су сорғы (МП-80, МП-100, МП-150, МП-350) насостары жұмылдырылған.
Одан бөлек, су тасқынының алдын алу мақсатында қазіргі таңда «Жетісай қызмет» мекеме теңгеріміндегі 15 дана су сорғыш құрылғылары жұмысқа дайын тұр. Аудан бойынша коммуналдық меншіктегі 12 тік дренаждың 3-і істеп тұрса, 5-і белгілі себептермен жұмыс жасамайды. Жерасты сулары көтерілген жағдайда қалған 4 тік дренаж іске қосылатын болады.
Қазіргі таңда, «Жетісай қызмет» мекемесі тарапынан қаладағы ирригация жүйелерін тазалау жұмыстары тоқтаусыз жүргізілуде.
«Табиғи апатты болдырмау, адам шығынының алдын алу мақсатында жергілікті әкімдіктер мен еріктілер тарапынан арнайы техникалар мен су сорғы насостары, 200-ден астам жеке құрам жұмыс істеуде.
Айта кетейік, бізге келіп түскен хабарламаларға сәйкес жеке құрам мен қажетті техникалар бірінші кезекте аса мұқтаж жандарға, яғни, көпбалалы отбасылар мен асыраушысынан айырылған, жалғызбасты, қоғамның әлсіз топтары саналатын мүмкіндігі шектеулі балалары бар отбасыларға, аз қамтамасыз етілген тұлғалардың үйлеріне, әлеуметтік нысандарға жіберіледі. Тұрғындардан жағдайға түсіністікпен қарауды сұраймыз» дейді аудан басшысы.
Аудан басшысының тікелей тапсырмасымен шұғыл шығындар есебінен қосымша су сорғы насостары сатып алынып, қажетті құрал-саймандар мен жанар-жағар май қажеттілікке сәйкес бөлініп отыр.
Орын алған қолайсыздықтарға байланысты қала, кент, ауылдық округтерден түскен хабарламалар бойынша төтенше жағдайлар бөлімі мен жергілікті әкімдіктер тарапынан қажетті техникалар, жеке құрам жұмылдырылып, су қашыру жұмыстары жүргізілуде.
Қазіргі таңда тұрғын үйлерге келетін қауіп жоқ. Аудандық төтенше жағдайлар бөлімі мен аудандық әкімдік тарапынан тәуліктік кезекшіліктер ұйымдастырылып, жағдай толықтай бақылауға алынған.
Бауыржан НАЙМАНОВ, Жетісай ауданы.
2023-02-01