АЛМАТЫДАҒЫ ТЕРГЕУ ИЗОЛЯТОРЫНАН 80-ГЕ ЖУЫҚ КҮДІКТІ БОСАТЫЛМАҚ
Posted by: Қалмұрат
in News, PRESS RELEASE, Қоғам, Қылмыс пен жаза
07/11/2022
30 Views
2022 жылы 2 қарашада Қазақстан Президенті Қасым-Жомарт Тоқаев «Рақымшылық жасау туралы» Заңға қол қойды.
Қанды қаңтар оқиғасы кезінде бейбіт шерумен бірге алаңға шығып, артынан арандатушылардың торына түсіп қалғандар көп. Аталған Заң бойынша осындай қаңтар оқиғасына қатысушылардың біразы ақталып, әртүрлі деңгейде қылмыс жасағандарға рақымшылық жасалмақ.
Жыл басында еліміздегі ең үлкен мегополис – Алматы қаласындағы № 72 мекемесіне (тергеу изоляторы) қаңтар оқиғасына қатысты 563 адам қамалған болатын. Бүгінде оның 65-і жазасын өтеу орындарына кетсе, 416 адам түрлі негіздер бойынша қамаудан босатылды. Қазір тергеу изоляторында қаңтар оқиғасына қатысты 82 адам ұсталуда.
«Рақымшылық жасау туралы» заңына байланысты осы күдіктілерге қатысты жұмыстар жүргізілуде. Олардың арасында мерзімінен бұрын шартты түрде босатылатындар мен жазасын жеңілдетуге жататындар бар, керісінше 3 адамның жасаған қылмысы рақымшылық жасауға жатпайды.
«Рақымшылық жасау туралы» ҚР Заңын қолдану үшін барлық материалдар Алматы қаласының аумақтық сотына жіберілді.
Аталған Заңда террорлық, экстремистік, сыбайлас жемқорлық қылмыстар, мемлекетке опасыздық жасау, азаптау, жаппай тәртіпсіздіктерді ұйымдастыру, кәмелетке толмағандардың жыныстық қол сұғылмаушылықтарына қарсы қылмыстар жасаған адамдарға рақымшылық жасалмайтыны көрсетілген.
Гүлнар МАҒЗҰМОВА,
Алматы қаласы.
Алматы қаласы Амнистия Қылмыс пен жаза Мерзімінен бұрын босату 2022-11-07
САЙЫПҚЫРАН.KZ Ақпаратты-сараптамалық порталы АҚПАРАТ ӘЛЕМДІ БИЛЕЙДІ!
