«АЛМАТЫМ ЖҮРЕГІМДЕ» ГАЛА-КОНЦЕРТІ ӨТЕДІ

        КСРО мен Қазақстанның Халық әртісі, «Халық қаһарманы» Роза Бағланованың 100 жылдығы аясында биыл тұңғыш рет «АЛМАТЫДАҒЫ АЛТЫН КҮЗ «ҚАЗАҚКОНЦЕРТПЕН» БІРГЕ» өнер фестивалі өтеді.

           Роза Бағланова ұзақ жылдар бойы Алматыда еңбек еткен. «Қазақтың бұлбұлына» қанат бітіріп, музыка өнерінің биігіне шарықтауына шабыт берген Алматы қаласы десек, артық болмас. Сондықтан «Қазақконцерттің» шығармашылық ұжымы Роза Тәжібайқызы ерекше жақсы көрген Алматы қаласында бірқатар мәдениет ұйымдарында ауқымды мерекелік шаралар өткізуді жоспарлап отыр.

         Фестиваль аясында 20 қазан күні Almaty Theatre-да белгілі эстрада әртістерінің қатысуымен «АЛМАТЫМ ЖҮРЕГІМДЕ» гала-концерті өтеді. Қазақ өнерінің саңлақтары бір сахнада бас қосатын мұндай ауқымды шара – сирек құбылыс!

         Шарада алматылықтар үшін халықтың сүйіктілеріне айналған «Қазақконцерттің» солистері Қазақстанның халық әртісі, Қазақстанның Еңбек Ері Роза Рымбаева, Қазақстанның халық әртістері Алтынбек Қоразбаев, Мақпал Жүнісова, Қазақстанның еңбек сіңірген әртістері Бағдат Сәмединова, Айжан Нұрмағамбетова, Қазақстанның еңбек сіңірген қайраткерлері Жанна Орынбасарова, Құрмаш Махан, халықаралық және республикалық байқаулардың лауреаттары Рухия Байдүкенова, Райым Уайыс, Алибек Әлмадиев, Салтанат Меңдіғалиева, Дидар Әбдухалық, Гүлсім Мырзабекова, Ербол Нариманұлы, сондай-ақ «Азия» және «Меломен» топтары өнер көрсетеді.

          Бұл дүбірлі думанның көрерменге ұмытылмас әсер, керемет көңіл-күй сыйлары анық. Келіңіздер, өнер мерекесінің куәгері болыңыздар!

М.ОРЫНБЕТОВА,

Роза Бағланова атындағы «Қазақконцерт»
мемлекеттік концерттік ұйымының
баспасөз қызметі.