ТАБИҒАТТЫ АЯЛАУ -ТАЗАЛЫҚТАН БАСТАЛАДЫ

           «Тазалық – денсаулық кепілі», «Дені саудың – жаны сау» деген аталы сөздерді текке айтпаған халқымыз қашан да қоршаған, өмір сүретін ортасының экологиялық таза болуына ерекше көңіл бөлген. Өйткені, елдің келешегі, көркеюі – салауатты өмір салтын ұстанатын, қауіпсіз ортада өмір сүретін өскелең ұрпақтың қолында екенін жақсы білген. Дені сау азамат қана қоғамның толыққанды мүшесі бола аларын жақсы ұғынған.

               Осыған орай бүгін Жетісай ауданында Түркістан облыстық табиғи ресурстар және табиғат пайдалануды реттеу басқармасының басшысы Қ.Әбдуәлиевтің хатына және Қазақстан Республикасы Экология, геология және табиғи ресурстар министрлігінің Экологиялық реттеу және бақылау комитетінің тапсырмасына сәйкес «Birge – taza Qazaqstan» Республикалық тазалық акциясы болып өтті.

             Ауданның көркіне көрік қосу, тазалығы мен экологиялық жағдайын жақсарту мақсатында өткен тазалық жұмыстарында Жетісай қаласындағы көпқабатты тұрғын үйлер мен жекеменшік секторлардың аулаларында, көшелер мен үйіргелік жерлерінде, сонымен қатар, «Достық» магитральды каналының К-26 каналының арнасы мен «Шардара» су қоймасының ауданға қарасты аймағында тазалау, қоқыстан тазарту жұмыстары жүргізілді.
Сенбілік барысында саябақтар мен көшелер, арық-атыздар тазаланып, арнайы қоқыс полигондарына шығарылды. Тазалық жұмыстарына жергілікті әкімдіктердің қызметкерлері мен волонтьерлардан 500-ге тарта азамат пен қатты тұрмыстық қалдықтарды шығаруға 8 техника жұмылдырылды. 40 тоннаға жуық қатты тұрмыстық қалдықтар шығарылды.

             «Өзін, отбасын сыйлайтын әрбір адам тазалық жұмыстарын жылдың барлық мезгілінде жүргізуі тиіс. Ауданның әрбір тұрғыны өзі тұратын үйдің ауласын таза ұстаса, бұл олардың өңір тазалығына қосқан үлесі. Ауданда осындай сенбіліктердің жиі өткізілуі қоғамның назарын көше тазалығын сақтап, экологиялық мәдениетті қалыптастыруда маңызы зор» дейді Жетісай ауданы әкімінің орынбасары Әшірбай Тасов.

           Ауданда жүргізілген әрбір тазалық жұмыстарына қатысушылардың саны күн санап артып келеді. Бұл – тұрғындардың туған өлкеге деген махаббаты, жанашырлығы екені анық. Мұнан бөлек аудан аумағындағы қала, кент, ауылдық округтерде тазалықты сақтау мақсатында арнайы түсіндіру жұмыстары да тынымсыз жүргізіліп отырғанын айтуымыз керек.

        «Ортақ үйіміздің көркейіп, гүлденуіне әрбір тұрғын бей-жай қарамай, қоқыс-қалдықтарды кез-келген жерге лақтырмай, таза ұстауға атсалысуы қажет. Сонда ғана біз болашағымыз үшін қауіпсіз, экологиялық таза орта қалыптастыра аламыз» дейді Жетісай ауданының тұрғын үй-коммуналдық шаруашылығы жолаушылар көлігі, автомобиль жолдары және тұрғын үй инспекциясы бөлімінің басшысы Берік Мамбетов.

            Аудан басшысының орынбасары Әшірбай Үсенбайұлының жетекшілігімен арнайы тазалық сақтау іс-шараларының жоспарлары бекітілген.

        Айта кетуіміз керек негізінен тәрбие бар жерде ғана тазалық болады. Ал, тазалық болған жерде денсаулық, өмір, өсімнің болатыны анық.

Бауыржан НАЙМАНОВ, Жетісай ауданы.