ТАРИХИ ТҮЙЕМОЙНАҚТАҒЫ «ЭТНО-АУЫЛҒА» САПАР

        «Ауыл» партиясының Абай облысы бойынша өңірлік филиалының төрағасы Смағұлов Қайрат Қанатұлы бастаған партия өкілдері әйгілі ақын, дана ойшыл Абай Құнанбайұлының 180 жылдық мерейтойы аясында Семей қаласындағы Түйемойнақ аралында орналасқан «Этно-ауылға» арнайы сапарлап қайтты.

       Іс-шараның басты мақсаты – Абай мұрасын ұлықтау, ұлттық құндылықтарды дәріптеу және қазақ халқының тарихи-мәдени мұрасына құрмет білдіру.

         «Этно-ауыл» жобасы – халқымыздың салт-дәстүрі мен өмір салтын кеңінен танытатын рухани-танымдық орта. Сапар барысында, өңірлік филиал өкілдері этнографиялық бағытта жабдықталған қазақы безендірілген киіз үйлермен, қолөнер және тұрмыстық бұйымдар ұсынылған көрмелермен, сондай-ақ ұлттық нақыштағы сауда-саттық алаңдарымен танысты. Партия өкілдері ұлттық нақышта тігілген киіз үйлердің сән-сәулеті мен ою-өрнекті ішкі жабдықталуына ерекше қызығушылық танытып, ұлттық қолөнер шеберлерінің туындыларына зор ықылас танытты.

           Сапардың мазмұнын арттыра түскен сәулелі сәттердің бірі – дәл осы күні ұйымдастырылған «Тоғызқұмалақ» ұлттық спорт ойыны. Өңірлік партия өкілдері ойынның өту барысын қызығушылықпен тамашалап, қатысушылармен еркін пікір алмасып, жастар арасындағы ұлттық ойынға деген қызығушылықты оң бағалады.

            Осынау дүбірге толы сапар – тек мерейтойлық іс-шара ғана емес, сонымен қатар  ұрпақ санасына өткеннің өшпес ізі мен ұлттық рухты сіңірудің жарқын көрінісіндей… Тарихи тағылымға тұнған киелі мекен – Түйемойнақ аралы мен ондағы «Этно-ауыл» алаңы мерейтойлық көңіл — күй сыйлап қана қоймай, ұлттық болмысымызды жаңғыртуға бағытталған мазмұнды сапарға айналды деп толыққанды айтуға негіз бар.

           «Ауыл» партиясы алдағы уақытта да елдің рухани жаңғыруы мен мәдени мұралардың насихатталуына барынша өз үлесін қоса бермек.

«Ауыл» партиясы Абай облысы бойынша өңірлік филиалының баспасөз қызметі.