Ветеринар мамандарға тағзым: Қоғам денсаулығының күзетінде тұрған жандар

           2002 жылы 10 шілдеде Қазақстан Республикасының «Ветеринария туралы» заңы қабылданып, ветеринария қызметі алғаш рет жүйелі түрде заңдық негізде реттеле бастады. Ал, 2024 жылы Үкіметтің қаулысымен дәл осы күн ресми кәсіби мереке ретінде белгіленді.

         Ветеринарлар – тек үй жануарларын емдеумен айналысатын дәрігерлер емес. Олар:
Ауыл шаруашылығы жануарларының індеттерінің алдын алады,
Жануарлардан адамға жұғуы мүмкін ауруларға тосқауыл болады,
Мал өнімдерінің – ет, сүт, жұмыртқа – қауіпсіздігін қамтамасыз етеді,
Экспорт пен импорттағы ветеринариялық бақылауды жүзеге асырады.

         Олардың жұмысы арқылы халықтың биологиялық қауіпсіздігі қорғалып, тұтынушыға сапалы әрі таза өнім жетеді.

        Соңғы жылдары ветеринария саласына мемлекет тарапынан көңіл бөліне бастады. Президент Қасым-Жомарт Тоқаев 2021 жылғы Жолдауында ветеринарлық қызметті биологиялық қауіпсіздіктің маңызды бөлігі ретінде атап, оны реформалау қажеттігін айтқан болатын.

         Бүгінде, ел аумағында 13 мыңнан астам ветеринар маман жұмыс істейді. Олардың еңбекақысы біртіндеп өсіп, материалдық-техникалық базалары жаңартылып жатыр. Мәселен: Ауылдық жерде еңбек ететін ветеринарлардың жалақысы соңғы екі жылда 2 есеге жуық артқан, Қала мен ауыл арасы бұрынғыдай алшақ емес – мамандардың қызметі цифрландырылып, онлайн тіркеу, есеп беру жеңілдетілді.

         Бұл мамандық – тек кәсіби білім мен дағдыны ғана емес, жүрек жылуын, мейірімділікті де талап етеді. Қанша жыл өтсе де, адалдығын жоғалтпаған ардагерлер де баршылық. Солардың бірі – 50 жылдан астам уақытын осы салаға арнаған Руфия Хабибрахманова. Ол зейнет жасында да жеке клиника ашып, жануарларға көмек көрсетіп келеді. «Адам мен жануардың арасындағы үндестік – ерекше. Олар да өмір мен мейірім тілейді», – дейді ол.

         Ветеринарлар күніне орай еліміздің түкпір-түкпірінде алғыс хаттар мен марапаттар тапсырылып, салалық форумдар, кездесулер, спорттық жарыстар ұйымдастырылуда. Бұл – ел ішінде ветеринарлардың еңбегі еленіп, абыройы артып келе жатқанын білдіреді.

          Ветеринария – тек жануарлар әлемін емдеу ғана емес, бұл – адамзатқа қызмет етудің бірегей үлгісі. Олар – малдың да, адамның да амандығы үшін күресіп жүрген нағыз мамандар.
10 шілде – оларға алғыс айтудың, еңбектерін құрметтеудің, қоғамдағы маңызды рөлін танудың нақты күні.

          Сондықтан, бүгін – жүрегімен қызмет етіп жүрген барлық ветеринар мамандарға мың алғыс айтып, кәсіби мерекемен құттықтайтын елеулі күн!

«Ауыл» партиясы Абай облысы бойынша өңірлік филиал баспасөз қызметі.