ШЕКАРАШЫЛАРҒА ҚАТЫСТЫ ШЕТІН МӘСЕЛЕ БОЛМАУҒА ТИІС – ДЕПУТАТ

          ҚР Парламенті Мәжілісінің депутаты, «Respublika» партиясы фракциясының мүшесі Олжас Құспеков өңірлерге жасаған сапары аясында ҰҚК Шекара қызметі Алматы облысы бойынша департаментінің Қарасай ауданы бойынша шекара басқармасында болды.

         Халық қалаулысын күтіп алған департамент бастығы полковник Әлібек Каюпов мәртебелі қонақты арнайы мақсаттағы ұтқыр іс-қимылдар тобының жұмысымен таныстырды. Ел шебінде күрделі тапсырмаларды орындау үшін жасақталған топтың заманауи үлгідегі киімдері қару-жарақтары да депутаттың назарынан тыс қалған жоқ. Әрі қарай, депутат О.Құспеков техникалық және кәсіби даярлық бөлімінің казармасы мен оқу-өндірістік зертханасын аралап көрді. Департамент бастығы депутатқа Шекара қызметінің бөлімшелеріне қажет мамандық түрлерін даярлау кезінде кездесетін өзекті мәселелерді жеткізді.

         Кездесу барысында шекара басқармасының жылу қазандығын қайта жаңғырту мәселесін шешу жолдары, шекара аумағын сумен қамту және кәріз жүйесіне қатысты мәселелер айтылды. Сондай-ақ, өздерінің Отан алдындағы азаматтық борышын туған елінің шекарасында өтеген мерзімді қызметтің сарбаздарын әскерден кейін жұмысқа орналасу мүмкіндігі де көтерілді. Осы жерде айту керек, департаментке қарасты шекара басқармаларының оқу базасында жас жауынгерлер курсынан өткен сарбаздарға мұнда мамандық алғанын айғақтайтын сертификат беріледі. Алайда, бұл құжат сарбаз әскерден оралған бетте өзінің күшін жоғалтады екен. Департамент бастығы полковник Ә.Каюпов депутатпен осы мәселені талқылады.

        – Мемлекет әскери қызметшілердің қызметін жақсарту үшін қолдан келгеннің барлығын жасауға тиіс. Заманауи үлгідегі техникалармен қамтамасыз етумен бірге тұрмыстық мәселелер де назардан тыс қалмайды. Шекарада сапалы және қауіпсіз қызмет атқару үшін барлық жағдай болуы қажет, – деді О.Құспеков.

         Шіліңгір шілде мен қақаған қаңтарда шекарамыздың тыныштығын күзетіп жүрген шекарашылардың әсіресе әлеуметтік-тұрмыстық жағдайы сын көтермейтінін осыған дейін де депутаттар айтып, дабыл қаққан болатын.

Тамара ДӘУЛЕТБАЕВА,

ҰҚК Шекара қызметінің запастағы подполковнигі.