ЖЕТІСАЙДА ВОЛЕЙБОЛДАН ОБЛЫСТЫҚ ТУРНИР ӨТТІ

         Жетісай аудандық мәдениет, тілдерді дамыту, дене шынықтыру және спорт бөліміне қарасты «Жетісай спорт клубы» мен Ислам Пірназаровтың шәкірттерінің ұйымдастыруымен Жетісай қаласында 2007 – 2008 жылы туылған қыздар арасында волейболдан облыстық турнир болып өтті.

       Облыстық сайыстың салтанатты ашылуына – Жетісай ауданы әкімінің орынбасары Серік Пірімбеков, Жетісай ауданының мәдениет, тілдерді дамыту, дене шынықтыру және спорт бөлімінің басшысы Еркебұлан Сейдалиев, «Жетісай спорт клубы» КММ директоры Таласхан Битуреев қатысып, спортшыларға сәттілік тіледі.

       Ауданның танымал азаматы болған, ұлағатты ұстаз Ислам Пірназаровты еске алуға арналған бұл облыстық бәсекеге Түркістан облысының барлық аудандары мен Шымкент қаласынан келген 16 командада 250-ге тарта спортшы қатысып, бақтарын сынасты.

         1959 жылы дүниеге келген  Ислам Пірназаров  волейболдан бірнеше дүркін аудандық, облыстық, республикалық жарыстарда жүлдегер атанған болатын. Ол 1984 жылдан бастап Жылы су ауылдық округіндегі М.Әуезов атындағы орта мектепте дене шынықтыру және алғашқы әскери дайындық пәндерінің мұғалімі болып өмірінің соңына дейін еңбек еткен. Ұстаздық ете жүріп оқушы қыздар арасында волейбол командасын құрып, аудандық, облыстық, республикалық жарыстарда алдыңғы қатардан көрініп жүрді.

        Командалар арасында өзара тартысты өткен ойындар төрешілердің бекіткен ережесіне сай қорытындыланып, IV орын  Мақтаарал ауданының командасы, ІІІ орын Қазығұрт ауданының құрама командасына, ІІ орын Отырар ауданының жастарынан құралған ойыншыларға бұйырса, жүлделі І орынды Жетісай ауданының «Жетісай спорт клубы» жеңіп алып, облыстық сайыстың чемпионы атанды.

          Сонымен қатар, жарыс кезінде үздік ойын үлгісін көрсеткен жекелеген ойыншылар да назардан тыс қалмай, сайыс соңында ұйымдастырушылар тарапынан қаржылай сыйлықтарымен, медальдарымен және дипломдарымен марапатталды.