МАРАТ АБУОВ: ЕГІСТІКТІ СУҒАРУ ЖҰМЫСТАРЫН ЖЕДЕЛДЕТУ КЕРЕК

         Биылғы жылдың тамыз айынан бастап көршілес Өзбекстан Республикасынан мемлекетаралық «Достық» магистралды каналы арқылы келетін ағын судың көлемі азайып, ағын судың жетіспеушілігі туындауы әбден мүмкін. Осыған орай жетісайлық жер емген шаруалар дәл қазіргі сәтте ешбір кедергісіз келіп жатқан суды тиімді пайдаланып, егістік алқаптардағы вегетациялық жұмыстарды жеделдетулері керек. Әрбір шаруа уақыт пен мүмкіндікті тиімді пайдаланып, еңбек етсе қиындықтарды да оңай еңсеруге мүмкіндік бар.

         Бұл жайында Жетісай ауданы әкімінің орынбасары Асан Маханбетов пен аудандық ауыл шаруашылығы бөлімінің басшысы Марат Абуовтың Мақталы және Қызылқұм ауылдық округтерінің шаруаларымен өткізген кездесулерінде айтылды.

        Сонымен қатар, ауыл шаруашылығы саласының мамандары мен шаруалар алдағы уақытта тапшылығы жиі сезіліп келе жатқан ағын суды үнемдей отырып мол өнімге қол жеткізу мақсатында тамшылатып суғару жүйесін енгізу, бір жерден 2-3 өнім алу тәсілдерін жүйелендіру, мақта зиянкестеріне қарсы күресті жүргізу секілді өзекті мәселелерді ортаға салды. Ұсыныс-пікірлер тыңдалып, сұрақтарға жауап берілді.

          «Біз шаруалармен кездесу барысында ауданның ауыл шаруашылығына қатысты бірқатар мәселелерді талқылап, тиімді тәсілдерін түсіндіруді мақсат еттік. Ортақ пікірлер мен ұсыныстар айтылды, күрмеуі қиын мәселелер аясында сұрақтар қойылды. Әрбір шаруаның пікірі біз үшін маңызды, хаттамаға енгіздік. Алдағы уақытта жауапты мекемелермен тиісті жұмыстарды жандандыратын боламыз» дейді, Жетісай аудандық ауыл шаруашылығы бөлімінің басшысы Марат Абуов.

Бауыржан НАЙМАНОВ.