ЖҮКТІЛІК КЕЗІНДЕГІ ҚАУІПТІ БЕЛГІЛЕР

      Жүктілік – қалыпты физиологиялық процесс.

       Көбінесе  жүкті әйелдер тек медицина қызметкерлерінің тарапынан бақылауы мен кеңесіне мұқтаж. Жүктілік кезіндегі арнайы емді қажет етпейтін физиологиялық өзгерістер: таңертеңгілік жүрек айну, құсу, дәм сезудің өзгеруі, терідегі дақтардың пайда болуы немесе күңгірттенуі, сүт бездерінің ауырсынуы.

      Жүктілік үш  триместерге бөлінеді. Бірінші  триместр жүктіліктің алғашқы үш айына, екіншісі жүктіліктің 4-6 айлық кезеңіне, үшіншісі- жүктіліктің 7-9 айлық кезеңіне сәйкес келеді.

      Бірінші триместерге медициналық көмекті қажет ететін қауіпті белгілер: тәулігіне 8-10 рет құсу, жыныс жолдарынан қан аралас шығындының бөлінуі, іштің немесе бүйірдің қатты ауыруы, әуелі сыздап, содан соң күшеюі мүмкін.

      Жүктіліктің екінші триместерінді медициналық көмекті жедел түрде қажет ететін белгілері: бастың үнемі немесе кенеттен ауыруы, көздің көруінің нашарлауы немесе көз алдында қара нүктелердің көрінуі, анық немесе кенеттен пайда болған ісіну және оның тез үдеуі, жыныстық жолдан қанды шығындының бөлінуі, іштің қатты және басылмай ауыруы, үнемі құсу, іштегі баланың 24 сағат бойы қозғалмауы, қынаптан көп сулы шығындының бөлінуі (қағанақ суының кетуі).

       Егер үшінші триместрде келесі белгілердің біреуі білінетін болса дереу медициналық көмекке жүгінуіңіз қажет: жыныстық жолдан қанды шығындының бөлінуі, қынаптан көп сулы шығындының бөлінуі (қағанақ суының кетуі), бастың үнемі немесе кенеттен ауыруы, көздің көруінің нашарлауы немесе көз алдында қара нүктелердің көрінуі, дене қызуының 38°С-ге дейін және одан жоғары көтерілуі, іштің қатты ауыруы, іштегі баланың әлсіз қозғалуы немесе мүлде қозғалмауы, араға 5-10 минут салып толғақтықтың қайталануы.

         Босанғаннан кейін міндетті түрде медициналық көмекті қажет ететін белгілер: ашық қызыл түсті немесе ұйыған қан түйіршіктерінің көп бөлінуі (гигиеналық төсенішті бір сағатта бірнеше рет ауыстыруға тура келсе), жыныстық жолдан, іріңді жағымсыз иісі бар шығындының бөлінуі, іштің төменгі тұсының қатты ауыруы, дене қызуының 38°С-ге дейін және одан жоғары көтерілуі, іште немесе бұтаралығындағы отадан кейінгі тігістің ауыруы және білеуленуі, сүт бездерінің ауыруы, қатаюы және қызаруы.

         Әрбір әйел өз жүктілігіне жауапкершілікпен қарауы тиіс, бұл оған ана болу және өмірге денсаулығы мықты баланы дүниеге әкелу бақытын сыйлайды!

Жүрсінова Айнұр Әшірбекқызы,

 Сұлутөбе дәрігерлік амбулаториясының акушері.