АУДАНЫМЫЗДА МАҚТАНЫҢ ЖАҢА СОРТЫ ЖАЙҚАЛЫП ӨСУДЕ

           Мақта-тоқыма кластерімен айналысатын өзбекстандық ең ірі компания – «Global textile» компаниясы, Түркістан облысы әкімдігімен жасалған екі жақты іскерлік келісім аясында 2023 жылдан бастап ауданымыздың нарығында жұмыс істеуге кіріскен болатын. Ал биыл осы компания біздің ауданымызда 3 мың гектарға жуық жерге өзбекстандық «Наманган» тұқым сортын жеткізіп, күзге қарай аталған сорттың мақта талшығын сатып алуды жоспарлап отыр.

             Ерте көктемнен бері диқандарымыздың тарапынан жүргізілген жұмыстардың арқасында мақтаның осы «Наманган-77» сорты жерсініп қана қоймай, жайқалып өсіп жатыр. Мақтаның бір бұтасында 20-дан астам жеміс элементтері (бүршіктер, гүлдер) дамуда. Мамандар егер де бәрі жоспардағыдай болса, онда мақтаның әр гектарынан орта есеппен 50 центнерден жоғары өнім алынады деп болжап отыр. Бір айта кететін жайт, мақтаның көлемі ғана емес, сапасы да жақсаруда.

       Түркістан облысы әкімдігі мен өзбекстандық инвестор бірігіп, ауданымызда 2 мыңнан астам адамды тұрақты жұмыс орнымен қамтитын 5 ірі кәсіпорынды іске қосуды жоспарлап отыр. Ол үшін 2023-2027 жылдарға арналған «Global textile.Turkistan» жобасы дайындалып, соның аясында жұмыстар жүргізілуде. Жалы құны 21 миллиард теңгені құрайтын бұл жобаның аясында логистика хабы, мақтаны бастапқы өңдеу зауыты, трикотаж мақта фабрикасы, мата бояу фабрикасы және тігін фабрикалары іске қосылады деген жоспар бар. Бүгінде аталған компания ауданымызда өздерінің алғашқы мақта қабылдау пунктін ашып жатыр.

          «Global textile» – мақтаның шитінен бастап жіп иіру, мата тоқу, киім тігуге дейінгі аралықтағы кластерді толық қамтитын компания. Қазіргі уақытта компанияның Ташкент қаласы мен Ферғана облысындағы 15-ке жуық кәсіпорынында 5 мыңнан астам адам жұмыс істейді.

С.ҚУАНЫШБЕК, Мақтарал ауданы.