МЕМЛЕКЕТТІК ҚЫЗМЕТШІЛЕР САХНАДА ӨНЕРЛЕРІН ПАШ ЕТТІ

      Мақтаарал ауданында 23 маусым — ҚР Мемлекеттік қызметшілер күні кәсіби мерекесіне арналған салтанатты кеш өтті.

       Мерекелік іс-шараға аудан әкімі м.у.а. Бейсенбай Төребеков арнайы қатысып, барша мемлекеттік қызметшілерді кәсіби мерекелерімен құттықтады. Сонымен қатар, белсенді еңбегімен көзге түскен бірнеше қызметшілерд3 алғыс хатымен марапаттады.

      «Мемлекеттік қызметкердің оң имиджін қалыптастыру – қиын және ұзақ үрдіс. Сіздің беделіңіз – мемлекет беделінің бір бөлігі екенін ешқашан естен шығармаңыздар. Халықтың игілігіне жұмыс істеп, елге қолайлы жағдай туғызуларыңыз керек. Мемлекеттік органға шағымданған, жүгінген кез-келген адам, мемлекет көрсетуге тиісті қызметтің барлығын еш сергелдеңсіз, дер кезінде және сапалы түрде алуы тиіс. Сондықтан да, кәсіби мерекелеріңізбен құттықтай отырып, баршаңыздың отбасыларыңызға амандық, дендеріңізге саулық, қызметтеріңізге табыс тілеймін» — деді Бейсенбай Тасболатұлы.

      Мұнан соң аудандық мәслихат аппаратының басшысы Ержан Салиев, ардагер мемлекеттік қызметшілер Пердеш Есенбеков пен Қасымбек Хаметов, «Amanat» партиясының аудандық филиалының атқарушы хатшысы Досым Асабаевтар құттықтау сөзге шығып, мәслихат аппараты тарапынан, кәсіподақ және партия тараптарынан бір топ мемлекеттік қызметшілерді марапаттады.

          Мерекелік шарада мемлекеттік қызметшілер және аудандық мәдениет үйінің қызметкерлері бірге концерттік бағдарлама дайындап, күнделікті қарбалас жұмыста көріп жүрген сала басшылары мен мамандары өздерін басқа қырларынан танытты.

           Атап айтқанда, аудан әкімінің орынбасары Алтын Ешанқұлова мен аудандық ішкі саясат бөлімінің басшысы Тамара Ташевалар «Әйел бақыты» әнін орындаса, аудан әкімі аппаратының персоналды басқару бөлімінің басшысы Сәкен Досымов орындаған «Балбырауын» күйі көптің көңілінен шықты. Сонымен қатар, ауданның қаржы және экономика бөлімінің бас маманы Нұрдәулет Құрманбековтың орындауындағы «Отыздан асып барамын» әніне қалың көрермен қошемет көрсетті.

      Мақтаарал ауданы әкімдігінің баспасөз қызметі.