ҚОСТАНАЙДА «АУЫЛ» ПАРТИЯСЫНЫҢ ӨҢІРЛІК ҚҰРЫЛЫМДАРЫ БАС ҚОСТЫ

       2025 жылғы 12 шілде күні Қостанай қаласында «Ауыл» партиясының өңірлік филиал төрағалары мен мәслихат депутаттарына арналған республикалық семинар-кездесу өтіп, оған ҚР Парламенті Мәжілісінің депутаты, партия төрағасы Серік Егізбаев жетекшілік етті.

       Басқосудың негізгі мақсаты – партия құрылымдарының 2025 жылдың ІІ тоқсанында атқарған жұмыстарын қорытындылап, өңірлік бастамаларды саралау және алдағы кезеңге нақты міндеттерді белгілеу болды.

           Семинар барысында, әр өңірдің өкілдері тоқсан ішінде жүзеге асырған қызметтерін таныстырып, жетістіктер мен өзекті мәселелерді ортаға салды. Партияның саяси ұстанымдары, ақпараттық-имидждік жұмыстары, қоғамдық қабылдаулардың тиімділігі, сондай-ақ, өңірлік активтердің белсенділігін арттыру жолдары кеңінен талқыланды.

          Ашық диалог форматында өткен семинар тәжірибе алмасу мен ұсыныс — пікір білдіруге арналған алаң ретінде ұйымдастырылды. Нәтижесінде, өңірлік жұмысты жетілдіруге бағытталған бірқатар нақты ұсыныстар қабылданды.

         Жиын аясында, ҚР Парламенті Мәжілісіндегі «Ауыл» партиясы фракциясының депутаттары еліміздің 20 өңірін қамтыған 10 күндік жұмыс сапарының қорытындыларын да ұсынды. Бұл сапар барысында бұқара көпшілік әлеуметпен, түрлі мекеме басшыларымен жүздесулер өтіп, 100-ден астам нақты сұрақтар мен ұсыныстар жинақталған. Олар алдағы уақытта Мәжіліс қабырғасында талқылауға шығарылмақ.

         Семинарға «Ауыл» партиясының әр облысы бойынша өңірлік филиалдарының төрағалары мен партия депутаттары және де партия өкілдері қатысты. Сондай-ақ, Атырау облыстық филиалы тоқсандық көрсеткіштер бойынша үздік үштікке еніп, жоғары нәтижеге қол жеткізген өңір ретінде атап өтілді.

          Айта кетейік, «Ауыл» партиясы Абай облысы бойынша филиал төрағасы Қайрат Қанатұлы Смағұловта аталған семинар-кездесуге қатысты.

              Семинар соңында, партияның өңірлік құрылымдарына нақты тапсырмалар жүктеліп, ІІІ тоқсанда іске асырылуы тиіс жобалар мен жұмыс бағыттары белгіленді. Партия төрағасы Серік Егізбаев барлық өңірлік филиалдарға ауыл халқының сұраныстарына жауап беретін нақты жұмыстарды жалғастыруды тапсырды.

«Ауыл» партиясы Абай облысы бойынша өңірлік филиал баспасөз қызметі.