ЖЕТІСАЙЛЫҚ ПОЛИЦЕЙЛЕР ЖОЛДАУҒА ҚОЛДАУ БІЛДІРДІ

        Қазақстан Республикасының Президенті Қасым-Жомарт Кемелұлы Тоқаевтың 2021 жылы 1 қыркүйектегі «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауын Жетісай аудандық полиция бөлімінің жеке құрамымен жедел кеңес өткізілді. Жедел кеңесте аудандық полиция бөлімінің бастығы, полиция полковнигі Ермахан Абдраманов Жолдаудың негізгі 7 бағытын, ондағы тапсырмалармен таныстырып, жеке құрам арасында талқылады.

             Мемлекет басшысының Жолдауындағы алтыншы мәселе аясында құқық қорғау жүйесіндегі елеулі өзгерістерге тоқталды. «Жолдауда қылмысқа қарсы күрес бойынша шаралар қабылдауға ерекше назар аударылды. Ең алдымен, бұл ішкі істер органдарының қызмет саласына қатысты. Бұл жерде алаяқтық, балаларға, әсіресе, ата-анасының қамқорлығынсыз қалған балаларға қарсы жыныстық қылмыстар жайлы атап өтті.  Мемлекет басшысы болашақ ұрпақтардың әл-ауқатына қауіп төндіретін есірткіні, оның ішінде синтетикалық есірткілерді таратуды атады. Барлық құқық қорғау органдарына «бұл инфекцияның біздің азаматтарымыз арасында, әсіресе, жастар арасында таралуына күшті тосқауыл қою» тапсырылды.

           Осыған байланысты, нашақорлыққа және есірткі бизнесіне қарсы күреске бейілді біздің бөлімшелеріміздің алдында үлкен жұмыс тұр. Сондай-ақ, сыбайлас жемқорлыққа қарсы тиімді күресті жалғастыру қажеттілігі атап өтілді. Мұнда өзіндік қауіпсіздік бөлімшелері мен кадрлық аппараттардың жұмысын жандандыру қажет.

           Жоғарыда аталған барлық шаралар саяси жүйені жетілдіруге және адам құқықтарын қорғауға бағытталған елдің стратегиялық бағытының құрамдас бөлігі болып табылады» деді аудандық полиция бөлімінің басшысы.  Сонымен қатар, жиын барысында құқық қорғау жүйесіндегі елеулі өзгерістердің енгізілуінің нәтижесінде қылмыстық процеске қатысушыларды қорғауды күшейту үш буынды модель арқылы іске асырылып жатқанын, ағымдағы жылдың басынан бері екі мыңнан астам азаматтың қылмыстық орбитаға негізсіз тартылуына жол берілмегені атап өтілді. Учаскелік инспекторлардың мәртебесінің артып, ішкі істер органдары бірқатар бейінді емес функциялардан босатылғандығы бүгінде оң нәтижелерге қол жеткізуге мүмкіндік беріп отырғандығы тілге тиек етілді.

           Жиын соңында Жолдауда айтылған тармақтарды іске асыру бағытында тиісті іс-шаралар атқару және әрбір полиция инспекторының танысуы, түсінуі қатаң тапсырылды.

Бауыржан НАЙМАНОВ.