ЖЕТІСАЙЛЫҚТАР КЕЗЕКТІ 3 ҰПАЙДЫ ЕНШІЛЕДІ

        Бүгін жергілікті «Жетісай» футбол клубы өз алаңында Павлодардың «Екібастұз» командасын қабылдап, жасыл алаңда басымдық танытып жанкүйерлерін кезекті жеңісімен қуантты.

       Жетісай ауданының әкімі Серік Үсенұлы Мамытов пен аудандық мәслихат төрағасы Медет Қасымов, аудандық мәслихат депутаты Елдос Ахметов жергілікті командаға жанкүйерлік жасап, жасыл алаңда қолдау көрсетіп ойынды тамашалады.

          Төрешінің ысқырығымен басталған бірінші таймның өзінде-ақ қарсыластың қақпасына қарша бораған шабуылдар қонақтарды тактикасынан жаңылдырып, қорғанысты күшейтуге мәжбүрледі. Дегенмен, Ерлан Шойтымовтың жолбарыстары павлодарлықтардың қорғанысын бұзып өтіп, 16-шы минутта 22 нөмерлі сұрмерген Ернар Қоспайевтың салған алғашқы голы есепті ашты. Сөйтті де, қонақжайлылық танытып шабуылды бәсеңдетті. Жасыл алаңда қарсылас болса да шынайы өмірде әріптес санайтын «Екібастұз» ойыншыларына таразы басын теңестіруге мүмкіндік берген алаң иелері шабуылды ұйымдастырғанымен соңына дейін жеткізбей бірінші таймды тәмамдады. Алғашқы 45 минутта есеп 1:0, өзгермеді.

           Кездесудің 54-ші минутында, яғни, екінші таймның басында 20 нөмірлі бомбардир Рамазан Абылайхан қарсыластарын ширатып алғысы келді ме, есепті еселеп екінші голды соқты. Ширек ғасырға жуық уақыт бұрын негізі қаланған клубтың ойыншысы намысқа тырысып кездесудің 57-ші минутында есепті қысқартқанымен, 4 минуттан соң алаңда атой салған «Жетісай» командасының тағы бір сұрмергені 21 нөмерлі Әділет Омарбектың голы есепті 3:1 жеткізді. Әйтсе де, кездесудің негізгі уақытының 73-ші минутында «Екібастұз» клубының ойыншысы Карам Сұлтанов есепті тағы қысқартты.

          Күннің ыстығына қарамай 90 минут бойы жасыл алаңда көрерменге тартысты әрі қызықты ойын сыйлаған қос команда арасындағы кездесудің қорытындысы осыдан кейін өзгермеді. Ойын 3:2 есебімен жетісайлық жігіттердің пайдасына шешілді.

           Осылайша кезекті 3 ұпайды қанжығасына байлаған жерлестеріміз 1XBET QFL Бірінші лигасының турнир кестесінде ІІІ орынға тұрақтады. Келесі кездесуін сырт алаңда 22-тамыз күні Ақтаудың «Каспий» командасына қарсы өткізетін болады.

Бауыржан НАЙМАНОВ.