ЕЛБАСЫ — ЕЛ МӘРТЕБЕСІ

Ертеңін ойлаған ел үшін бүгінгі жеткен жетістіктерімізге аз күш жұмсалған жоқ. Ол үшін бейбітшілік қажет. Ал, бүгінгі елдегі тыныштық пен ұлтаралық татулық әрбір отбасының шаңырағының шайқалмауының, түтінінің түзу шығуының басты өлшемі. Тарихы қалың, тағдыры терең еліміздің бүгінгі бағындырған белестері Елбасының салиқалы саясатының жемісі. Осылай деп ой қорытындылаған жетісайлықтар «1 желтоқсан – Тұңғыш Президент күні» мерекесін жоғары деңгейде атап өтті.

Шарада ел басына түскен қиын-қыстау күндерде көрегенділік танытып, қамқорлық жасай алған Елбасының сындарлы саясатының арқасында бүгінде Қазақстанды әлем танып, әлем мойындағанын, әлемнің алпауыт елдерінің өзі Елбасымызбен санасып, ақылдасатын күйге жеткенін, мұның бәрі әрине елін сүйген Елбасының қажырлы еңбегі екенін айтқан аудан әкімі Мұрат Болатұлы жұртшылықты мерекемен құттықтады.

«Әлем Қазақстанды Елбасының арқасында таныды, мойындады. Тұңғыш Президент күні мерекесі қазақ халқының мемлекет болып қалыптасуының маңызды кезеңін айқындады. Тәуелсіздік алған алғашқы күндерден бастап Қазақстан өзін бейбітсүйгіш, бірлік пен татулықты ту етіп ұстанған ел ретінде көрсете білді. Ендігі жерде әрқайсымыз елдік танытып, қолға алынған әрбір бастамаларды қолдап отырсақ мемлекетіміздің келешегі бұдан да кемелдене түсетіні күмәнсіз.
Құрметті жетісайлықтар!
Бүгінде ел тарихына алтын әріптермен жазылатын «1 желтоқсан – ҚР Тұңғыш Президенті күні» мерекесі елдікті ту еткен халқымыздың асқақ арманы мен айбарлы рухының мерекесіне айналуда. Баршаңызды мерейлі мерекемен құттықтай отырып дендеріңізге саулық, отбасыларыңызға амандық, жұмыстарыңызға табыс тілеймін!» деді аудан басшысы өз құттықтауында.

Небәрі 44 жасында ел тізгінін ұстап, қазақ деген қайсар халықты дамушы емес дамыған елдердің қатарына қосқан ҚР Тұңғыш Президенті күні мерекесінде Мұрат Болатұлы ел дамуына қажырлы еңбек етіп, үлесін қосқан азаматтарды марапаттап, сый-құрмет көрсетті.

«Бүгінгі күн – еліміздің жастарын рухани тұрғыда тәрбиелеп, елдің болашағы үшін аянбай еңбек етуге бағыттайтын ерекше күн. Өйткені, бұл мерекеде жоқтан бар жасай білген, шекарамызды шегелеп, бейбітшіліктің қасиетін ұғындыра білген Елбасымыздың еңбектері дәріптеліп, халықаралық аренадағы қазақ елінің абыройы айқындалады.
Міне, осы мерекеде бізді шақырып, атқарған еңбегімізді бағалаған басшыларға алғыс айта отырып қазақстандықтардың деніне саулық, шаңырақтарына береке мен бірлік тілеймін» дейді «С-Информ» республикалық қоғамдық-саяси газетінің тілшісі Лаззат Тулемисова.

2012-жылдан бастап қазақ тарихына айтулы күн болып енген «ҚР Тұңғыш Президенті күні» мерекесінде әлеуметтің әлеуетін жақсарту жолында қажырлы еңбек еткен ұлт көшбасшысының өмірі мен еңбектері дәріптелген кітап және фото көрмелері ұйымдастырылып, аудан өнерпаздарының концерттік бағдарламасы қойылды. Шырқалған ән мен күмбірлеген күй Жетісай аспанын мерекелік көтеріңкі күйге бөледі.

Бауыржан НАЙМАНОВ,
Жетісай ауданы.