«ОТБАСЫ КҮНІ» МЕРЕКЕСІ – БАҚЫТ БАСТАУЫ!

         Қазақстанда қыркүйек айының екінші жексенбісі «Отбасы күні» ретінде аталынып өтіледі. Бұл мереке – отбасы құндылықтарын дәріптеп, ұрпақтар сабақтастығын нығайтуға арналған ерекше күн есебінде. Отбасы – әр адамның жүрегіне жақын, өмірінің алтын діңгегі деуге болады.

         Ол – мейірім мен махаббаттың, сыйластық пен татулықтың ұясы.

          Отбасы дегеніміз – кез келген мемлекеттің ең басты байлығы саналады. Себебі, қоғамның іргетасы мықты, тату-тәтті отбасылардан қаланбақ. Бала тәрбиесі де отбасының жылуынан басталады. «Ұяда не көрсе, ұшқанда соны іледі» деген халық даналығы осыны меңзесе керекті. Әке – отбасының қорғаны, ана – мейірімнің бұлағы, ал, бала – ата мен ананың үзілмес жарық үмітінің жалғасындай…

         «Отбасы күні» – жақындармен бірге бас қосып, ата-анаға құрмет көрсетіп, ұрпаққа өнеге боларлық ізгі дәстүрлерді жаңғыртуға мүмкіндік беретін тағылымды мереке!  Бұл күнгі негізгі мақсат – әр адамның отбасына деген сүйіспеншілігін арттыру, бірліктің, сыйластықтың, өзара қолдаудың маңызын еске салу. Еліміздегі көптеген  мектептер мен мәдениет үйлерінде түрлі концерттік  іс-шаралар, ұлттық нақыштағы көрмелер, заманауи сайыстар ұйымдастырылып, жас ұрпаққа отбасы құндылықтарын насихаттайтын тәрбиелік бағдарламалар өткізіліп келеді.

        Қазақ халқы үшін отбасы – қастерлі ұғым. «Отан – отбасынан басталады» деп бекерге айтпаған. Біздің салт-дәстүрімізде үлкенді сыйлау, кішіге қамқор, ізетті болу,  туыстық қатынасты сақтау – ұрпақтан-ұрпаққа жалғасып келе жатқан асыл қасиеттер.  Бұл мереке ата-баба аманатын ұмытпай, отбасының берекесін сақтау керектігін тағы да еске салатынын  айқындайды.

       «Отбасы күні» – әрбір жан үшін жүрекке жылу сыйлайтын, жақындарға деген махаббатты арттыратын мейрам. Бұл мереке, отбасының адам өміріндегі орны ерекше екенін көрсетіп қана қоймай, қоғамның да рухани дамуына жол ашпақ денім келеді.

        Қазақ еліндегі әрбір «Отбасының» әр күні  махаббат пен сыйластыққа толы болып, әрбір шаңырақ дара қуанышқа кенеліп, бал — бақуатты ғұмыр кешсін!

«Ауыл» партиясы Абай облысы бойынша өңірлік филиалы

баспасөз қызметі.