ОТБАСЫ БАНКІ МАҚТААРАЛ АУДАНЫНДА ФИЛИАЛЫН АШТЫ

         Мақтаарал ауданының орталығы Мырзакент кентінде «Отбасы» тұрғын үй құрылыс жинақ банкінің филиалы ашылды. Бүгін аудан әкімінің орынбасары Бейсенбай Төребеков нысанның ресми ашылу рәсіміне қатысып, банктің ұжымына сәттілік тіледі.

         «Ел азаматтарын баспанамен қамтамасыз етудегі ел тарихында Сіздердің банктеріңіздің алатын орны ерекше. Мыңдаған отбасылар «Отбасы» банкі арқылы үйлі болып, шаңырақтарына шаттық ендірді. Осындай банктің филиалы ауданымызда ашылып жатқанына өте қуаныштымыз!» — деді Бейсенбай Тасболатұлы.

      Айта кетейік, «Отбасы» Тұрғын үй құрылыс жинақ банкі 2003 жылы құрылған болатын. Банктің жарғылық капиталына мемлекет 100% қатысады.

          Отбасы банкі — ипотекалық кредитті 5% және одан да төмен мөлшерлемемен алудың бірегей тәсілі. Тұрғын үй құрылыс жинақ банкінің несиелерін еліміздің кез келген жерінен тұрғын үй сатып алуға немесе тұрғын үй жағдайларын жақсартуға ғана пайдалануға болады.

        Екі еселенген ең төменгі күнкөріс деңгейіне дейін табысы бар, бірақ баспанасы жоқ отбасылар (оның ішінде көпбалалы, толық емес және мүмкіндігі шектеулі балаларды асырап отырған отбасылар) «Бақытты Отбасы» бағдарламасына, ал 3,1 күнкөріс минимумына дейін табысқа ие баспанасыз отбасылар «5-10-20» пилоттық жобасына қатыса алады.

 Мақтаарал ауданы әкімдігінің баспасөз қызметі.