ВИЦЕ-МИНИСТР АУДАНЫМЫЗДЫҢ ШАРУАЛАРЫМЕН КЕЗДЕСТІ

        Ауыл шаруашылығы саласының өзекті мәселелерін талқылау мақсатында Қазақстан Республикасы Су ресурстары және ирригация бірінші вице-министрі Нұрлан Жанұзақұлы Алдамжаров Жетісай ауданына арнайы іссапармен келіп, шаруаларымен кездесті.

         Сапардың негізгі мақсаты — ағын су тапшылығына байланысты жағдайды талдау, алдағы вегетациялық кезеңге дайындықты пысықтау және ирригациялық инфрақұрылымды жаңарту мәселелері бойынша ұсыныстарды тыңдау болды.

         Вице-министр сапар барысында К-21, К-28, К-30 сияқты «Достық» магистральді каналының негізгі тармақтарымен танысты. Аталған арналар — өңірдегі ауыл шаруашылығы алқаптарын сумен қамтамасыз ететін басты инфрақұрылым нысандары. Алайда соңғы жылдары бұл арналарда ағын су тапшылығы қатты сезілуде.

         Ашық аспан астында өткен кездесуде шаруалар өңірдің басты табыс көзі — егін шаруашылығына тікелей әсер ететін ағын судың жетіспеушілігі, каналдардың тозуы, су шығынының артуы және жер асты суларымен байланысты қиындықтар жайлы ашық айтты.

          «Ағын су егістікке жеткенше біраз бөлігі жерге сіңіп кетеді, буланып жоғалады. Тозығы жеткен каналдар суды үнемді жеткізе алмай отыр. Күрделі жөндеу қажет», – деді шаруалар.

           Жауап ретінде Нұрлан Алдамжаров:

• Ағын су арналары кезең-кезеңімен күрделі жөндеуден өтетінін;

• Су үнемдеу технологияларын енгізген шаруашылықтарға мемлекеттік субсидия қарастырылатынын;

• Жетісай мен Мақтаарал аудандары үшін 100 су сорғы қондырғысын жеткізу жоспары бар екенін мәлімдеді.

         Ол сондай-ақ тамшылатып және жаңбырлатып суару әдістерін меңгерудің маңыздылығын айтып, бұл тәсілдердің су шығынын бірнеше есе азайтып, өнімділікті арттыратынын жеткізді.

          Кездесу барысында диқандар өзекті сұрақтарын қойып, су тапшылығына қатысты нақты шешімдерді талап етті. Вице-министр тарапынан әрбір ұсыныс пен мәселе назарға алынып, ретімен қаралатыны, тиісті министрліктер мен мекемелерге жолданатыны айтылды.